Ólafur Örn fékk rautt með Brann

Varnarmaðurinn Ólafur Örn Bjarnason hjá Brann fékk rauða spjaldið á 77. mínútu þegar Tromsø og Brann gerðu 1-1 jafntefli í norsku úrvalsdeildinni í knattspyrnu í kvöld. Kristján Örn Sigurðsson lék allan leikinn í vörn Brann sem er í 6. sæti deildarinnar með 25 stig, 9 stigum á eftir toppliði Start sem marði 1-1 jafntefli með marki á 90. mínútu gegn Stefáni Gíslasyni og félögum í Lyn. Jóhannes Harðarson var í byrjunarliði Start en var skipt út af á 64. mínútu. Stefán lék að venju allan leikinn í liði Lyn. Hannes Sigurðsson lék allan leikinn í sókninni hjá Viking sem tapaði á útivelli fyrir Lillestrøm, 2-0. Haraldur Freyr Guðmundsson lék allan leikinn í liði Aalesund sem gerði 1-1 jafntefli við Ham-Kam.