Æsispennandi í Leirunni

Spennan er mögnuð í karlaflokki á Íslandsmótinu í golfi sem fram fer í Leiru en Heiðar Davíð Bragason vann efsta sætið aftur eftir að hafa sett niður fugl á níundu holu. Heiðar tapaði efsta sætinu til Ólafs Más Sigurðssonar á 8. braut en Ólafur Már fékk skolla á níundu holu og er því einu höggi á eftir Heiðari þegar 9 holur eru eftir af þriðja hring, samtals á 2 höggum undir pari. Sigurpáll Geir Sveinsson fylgir þeim eftir, er á parinu í dag eftir 9 holur og er samtals á pari, 2 höggum á eftir Ólafi Má. Þórdís Geirsdóttir úr GKJ lauk þriðja hring í kvennaflokki í dag á 8 höggum yfir pari og er samtals á 12 höggum yfir pari. Nína Björk Geirsdóttur úr GKJ er í öðru sæti, þremur höggum á eftir og síðan koma þær Ólöf María Jónsdóttir, GK, og Ragnhildur Sigurðardóttir, GR, á samtals 16 höggum yfir pari. Þórdís, Nína og Ólöf María leika því í síðasta hollinu á morgun.