Couch hefur óvænt forystu

Bandaríkjamaðurinn Chris Couch hefur óvænt forystu á Opna Chialis Western mótinu í bandarísku mótaröðinni í golfi en leikið er í Lemont í Illinois. Couch var boðið á mótið eftir tvo sigra á áskorendamótaröðinni. Hann lék á 67 höggum í gær og er samtals á níu höggum undir pari eftir 36 holur. Bandaríkjamennirnir Tim Herron, Jim Furyk og Duffy Waldorf eru í öðru sæti, höggi á eftir. Besti kylfingur heims, Tiger Woods, lék á 66 höggum í gær, fimm undir pari, og er sex höggum á eftir Couch. Vijay Singh rétt skreið í gegnum niðurskurðinn og er á pari eftir 36 holur. Sýnt verður beint á Sýn frá lokadegi mótsins á sunnudag. Daninn Thomas Björn og Walesverjinn Jamie Donaldson eru efstir á Opna evrópska meistaramótinu í golfi en leikið er á Írlandi. Kylfingarnir eru á fimm höggum undir pari eftir holurnar 36. Fimm kylfingar eru höggi á eftir, m.a. Darren Clarke. Retief Goosen er á þremur undir pari og virðist vera búinn að ná sér eftir hrunið á lokadegi Bandaríska meistaramótsins á dögunum. Þekktir kylfingar komust ekki í gegnum niðurskurðinn eins og Padraig Harrington, Ian Poulter og Ian Woosnam.