Fáir hlynntir Héðinsfjarðagöngum

Mikill meirihluti er á móti því að ráðist verði í gerð Héðinsfjarðarganga eins og samgönguáætlun Sturla Böðvarssonar gerir ráð fyrir samkvæmt nýrri skoðanakönnun Fréttablaðsins. Eru alls tæp 70 prósent þeirra sem afstöðu tóku á móti framkvæmdinni en aðeins rétt rúm 30 prósent fylgjandi. Andstaðan við Héðinsfjarðargöng er mest áberandi meðal íbúa á höfuðborgarsvæðinu en þar eru 78.4 prósent alfarið á móti göngunum en tæplega 22 prósent þeim fylgjandi. Göngin hljóta heldur ekki náð fyrir augum landsbyggðarfólks. Tæp 57 prósent þeirra telja að ekki eigi að ráðast í gangagerð um Héðinsfjörð en 43 prósent eru þeim fylgjandi. Tiltölulega lítill munur reyndist vera milli kynja. Þannig reyndust 26.5 prósent karla og 34.8 prósent kvenna hlynnt fyrirhuguðum framkvæmdum. Meiri andstaða mælist þó meðal karlmanna eða 73.5 prósent en 65.2 prósent hjá kvenfólki. Fjölmörgum aðilum á suðvesturhorni landsins hefur blöskrað hversu lítill hluti fjármagns er ætlað til samgöngubóta á því svæði en þangað fer aðeins um 20 prósent þess fés sem nota á til nýframkvæmda í vegamálum. Hefur Gunnar I. Birgisson, þingmaður Sjálfstæðisflokks, meðal annars lagt fram breytingartillögur á frumvarpinu sem fela meðal annars í sér að Héðinsfjarðargöng verða slegin af og meira fé veitt til verkefna á suðvesturhorni landsins. Könnunin var gerð símleiðis á sunnudaginn og var úrtakið 800 manns sem skiptust jafnt milli kynja og hlutfallslega eftir kjördæmum. Var spurt hvort viðkomandi væri sammála því að gerð verði jarðgöng um Héðinsfjörð. Af aðspurðum kusu 29 ekki að svara og aðrir 137 voru óákveðnir og því 634 sem afstöðu tóku eða 79,3 prósent.