Owen neitar orðrómum

"Það var ekki ég sem kom þessum orðrómum af stað. Fólk er alltaf að tala um framtíð mína hjá Real af því ég er ekki í byrjunarliðinu, en ég get fullvissað alla um að þessar vangaveltur um endurkomu mína í ensku knattspyrnuna eru ekki frá mér komnar," sagði enski landsliðsmaðurinn Michael Owen, sem greinilega er orðinn mjög þreyttur á slúðrinu. Þessir orðrómar hafa verið viðverandi lengi, ekki síst vegna þeirrar staðreyndar að þrátt fyrir að hafa skorað grimmt fyrir Real Madrid í vetur, hefur Michael Owen ekki fengið fast sæti í liðinu. Menn hafa bent á að leikmaðurinn hljóti að vera ósáttur við að hafa ekki fengið að spila meira með Real, þótt tölfræði hans sýni að hann skorar flest mörk allra í spænsku deildinni miðað við leiknar mínútur.