Minnist páfa með lagi á latínu

Menn fara ólíkar leiðir til að minnast páfa. Finnskur prófessor, sem þekktur er fyrir að syngja lög Elvis Presleys á latínu, hyggst senda frá sér nýtt lag á föstudag þegar páfi verður jarðaður. Prófessorinn Jukka Ammondt hefur áður gefið út Nunc hic aut Numquam, eða It´s Now or Never, og Ne calces mi glaucos calceos, eða Blue Suede Shoes, en verður þjóðlegri í þetta sinn því nýja smáskífan nefnist Codex Fluitans og hefur að geyma samnefnt lag sem á finnsku nefnist Ajopuu.

Ammondt, sem á sér hóp aðdáenda í heimalandi sínu, hyggst koma laginu til Vatíkansins á föstudag í gegnum finnska sendiherrann þar, en þess má geta að Jóhannes Páll páfi annar verðlaunaði prófessorinn fyrir ellefu árum fyrir latnesku plötuna Tango Triste Finnicum eða Sorglegur, finnskur tangó.