Þarf samþykki Fjármálaeftirlitsins

Samþykki Fjármálaeftirlitsins þarf til þess að kaup Straums á ríflega fjórtán prósenta hlut í Íslandsbanka standist. Deilt er um hvað liggur að baki viðskiptunum, ýmist er talað um að Landsbankamenn ætli sér bakdyrameginn inn í Íslandsbanka eða að þeir séu að breiða yfir vandræðagang vegna misheppnaðra tilrauna til að ná þar yfirráðum.  Enn er talað um umskipti á fjármálamarkaði. Í gærkvöldi náðust samningar um að fjárfestingarbankinn Straumur eignaðist um fjórtán og hálfs prósents hlut í Íslandsbanka. Seljendurnir eru Landsbankinn og tengdir aðilar. Í staðinn eignast þeir fjórðungshlut í Straumi og nokkrar krónur í vasann, eða tæplega fimm milljarða króna. Þessi viðskipti vekja mikla athygli á markaði en lengi hefur verið talað um óvænt kaup Orra Vigfússonar og Helga Magnússonar á stórum hlut í Íslandsbanka. Þeir keyptu með framvirkum samningum við Landsbanka og Burðarás en virðast í reynd aldrei hafa greitt neitt fyrir. Sérfræðingar á fjármálamarkaði hafa litið svo á að Landsbankamenn hafi fengið þá Helga og Orra til að leppa fyrir sig en fjármálaeftirlitið var með til skoðunar hlutabréfasöfnun þeirra í samkeppnisaðilanum. Þeir sem hlut eiga að máli hafa lítið viljað tjá sig í dag. Því standa eftir vangaveltur fjármálasérfræðinga sem telja viðskiptin leiða til að breiða yfir vandræðagang með Íslandsbankabréfin, og að Straumur hafi orðið fyrir valinu þar sem þar sárvanti menn aðgang að þeim góðu viðskiptatengslum sem Björgólfur Thor Björgólfsson hefur utan landsteinana. Fjármálaeftirlitið hefur mánuð til að fjalla um viðskiptin eftir að formleg umsókn berst en það er venjan þegar um meira en tíu prósenta hlut í banka er að ræða.