Skoða samstarf við OgVodafone

Norðurljós munu kanna möguleika á samstarfi við Og Vodafone varðandi stafræna dreifingu á sjónvarpsefni, að sögn Skarphéðins Berg Steinarssonar, stjórnarformanns Norðurljósa. "Við munum skoða aðrar leiðir varðandi samstarf á sviði síma- og fjarskiptamála og er þá eðlilegast að líta fyrst til Og Vodafone," segir Skarphéðinn. Norðurljós hafa þegar tekið næsta skrefið í þróun stafræns sjónvarps með nýju stafrænu dreifikerfi sem fyritækið mun taka í notkun 1. nóvember. "Takmarkið er algjörlega gagnvirkt kerfi en til þess að svo megi vera þarf símalínu sem gengur í báðar áttir. Við vorum í viðræðum við Símann um að nýta okkur ljósleiðarakerfi þeirra en töldum að tæknin væri ekki komin nægilega langt á veg hjá Símanum til að gæðin væru ásættanleg fyrir viðskiptavini okkar," segir Skarphéðinn. Hann segir núverandi dreifikerfi Norðurljósa orðið úrelt og því hafi fyrirtækið þurft að bregðast við því eins fljótt og hægt er. Það hafi fyrirtækið gert með því að byggja upp eigið dreifikerfi fyrir stafrænar sjónvarpsútsendingar í lofti. Hins vegar þurfi Norðurljós að leita til síma- og fjarskiptafyrirtækis svo nýta megi möguleikana á fullri gagnvirkni í sjónvarpsútsendingum í framtíðinni. "Við þróun á stafrænu sjónvarpi í gegnum ljósleiðara þarf samstarf stórs fjölmiðlafyrirtækis og fjarskiptafyrirtækis. Það er ljóst að við munum ekki leita til Símans því fyrst Síminn er kominn í eitt fjölmiðlafyrirtæki geta þeir ekki unnið með öðru," segir Skarphéðinn. "Kaup Símans í Skjá einum rýra því verðgildi Símans því það er mikið hagsmunamál fyrir símafyrirtæki almennt að þróunin í sjónvarpsútsendingum verði sú að nýta dreifikerfi fjarskiptafyrirtækja áfram að ræða við fleiri efnisveitendur um samstarf og áður en langt um líður muni einnig verða hægt að bjóða upp á gagnvirka þjónustu með stafrænni fjarskiptatækni.