Hlýrri suðlægri átt beint til landsins

Þetta er meðal þess sem fram kemur í hugleiðingum veðurfræðings á Veðurstofu Íslands. Þar segir þó að víða verði kaldi eða stinningskaldi í dag en hvassara í vinstrengjum á norðvestanverðu landinu. Sunnanáttinni fylgir súld eða rigning með köflum sunnan- og vestanlands, en í öðrum landshlutum verður yfirleitt þurrt. Hiti 7 til 15 stig, hlýjast á Austurlandi.

Í nótt nálgast skilabakki úr vestri. Áttin verður því áfram suðlæg í fyrramálið, víða 10-18 metrar á sekúndu og talsverð rigning sunnan- og vestantil en þurrt að kalla um landið norðaustanvert.

Í kjölfar skilanna snýst í minnkandi suðvestanátt með lítilsháttar skúrum, fyrst vestast landinu þar sem skilin ganga yfir þegar líður að hádegi. Kólnar smám saman. Á miðvikudag er svo útlit fyrir hæglætis sunnanátt með dálitlum skúrum á víð og dreif, en léttskýjuðu veðri á Norðaustur- og Austurlandi.

Veðurhorfur á landinu næstu daga:

Á þriðjudag:

Sunnan 10-18 m/s um morguninn og rigning sunnan- og vestanlands, en þurrt norðaustantil. Hiti 8 til 13 stig. Snýst síðan í minnkandi suðvestanátt með lítilsháttar skúrum, fyrst vestast á landinu. Kólnar smám saman.

Á miðvikudag:

Suðvestan 5-13, en hægari sunnanlands. Skýjað með köflum og dálitlar skúrir á víð og dreif, en léttskýjað á Norðaustur- og Austurlandi. Hiti 2 til 8 stig að deginum.

Á fimmtudag:

Sunnan 8-15 og rigning með köflum, en úrkomulítið um landið norðaustanvert. Vestlægari síðdegis og dregur úr vætu. Hiti 4 til 10 stig yfir daginn.

Á föstudag:

Suðvestan 5-13. Skýjað með köflum og fer að rigna síðdegis, en lengst af bjart um landið austanvert. Kólnar í veðri.

Á laugardag:

Suðvestanátt og rigning, en þurrt að kalla norðaustan- og austanlands. Fremur milt.

Á sunnudag:

Suðvestlæg eða breytileg átt og kólnar með éljum um landið vestanvert.