Upp­stokkun í fullri sátt innan Fram­sóknar

Tilkynnt var um breytingarnar á Alþingi í morgun. Þórarinn Ingi Pétursson tekur sæti Höllu sem aðalmaður í umhverfis- og samgöngunefnd. Hann tekur einnig sæti Ingibjargar Isaksen í velferðarnefnd.

Ingibjörg tekur á móti sæti Stefáns Vagns í fjárlaganefnd. Fleiri breytingar verða á varamannssætum.

Halla verður áfram varamaður í utanríkismálanefnd og áheyrnarfulltrúi í tveimur öðrum nefndum en stendur nú án aðalmannssætis í fastanefnd.

Þórarinn hafði ekkert aðalmannssæti

Stefán segir ákveðið hafa verið að breyta nefndaskipan um mitt kjörtímabil, meðal annars í fjárlaganefnd.

Þórarinn hefði ekki verið aðalmaður í neinni nefnd fyrri hluta kjörtímabilsins og því hefði þótt eðlilegt að hann fengi aðalmannssæti seinni hlutann.

Stefán hafði þegar sagt í mars að þingflokkurinn ætti eftir að fara yfir nefndaskipan. Þá sat Þórarinn ekki í neinni fastanefnd en var áheyrnarfulltrúi í tveimur.

Samþykkt samhljóða

Stefán segir breytingar á nefndaskipan vera á forræði þingflokksformanns. Niðurstaðan hafi verið fengin eftir samtal við alla þingmenn Framsóknar og síðan borin undir þingflokkinn.

Ákvörðunin hafi verið samþykkt samhljóða og ekkert ósætti verið um skiptinguna. Samráð hafi verið haft við Höllu um nefndasetu hennar og tekið mið af hennar óskum. Stefán segir hana áfram njóta fulls trausts þingflokksins.