Fer frá Hlíðar­enda til Molde

Sóley Edda, sem er aðeins 18 ára gömul, verður þar með liðsfélagi landsliðskonunnar Amöndu Andradóttur hjá Molde sem er í 7. sæti af 12 liðum í norsku úrvasldeildinni.

Sóley Edda er uppalin hjá Stjörnunni en kom til Vals í desember 2024, eftir að hafa þá þegar spilað sitt fyrsta tímabil í efstu deild, og hefur verið í stóru hlutverki hjá Valsliðinu.

Hún á auk þess að baki 35 leiki fyrir yngri landslið Íslands og var í byrjunarliðinu í öllum þremur leikjunum í lokakeppni EM U19-landsliða í sumar.

„Við erum virkilega ánægð fyrir hönd Sóleyjar og teljum þetta frábært tækifæri fyrir hana. Sóley hefur staðið sig mjög vel hjá Val og þroskast mikið undanfarin 2 ár og á þetta sannarlega skilið. Til hamingju Sóley og gangi þér vel,“ segir Gareth Owen, yfirmaður knattspyrnumála Vals, á samfélagsmiðlum félagsins.

Sóley Edda var ekki í leikmannahópi Vals í gær þegar liðið kom sér úr fallsæti með 4-1 útisigri gegn Grindavík/Njarðvík suður með sjó. Hún hefur leikið sautján leiki í Bestu deildinni í sumar, þar af 13 í byrjunarliði.