Sindri Hrafn tíundi á Evrópu­mótinu

Sindri Hrafn varð þriðji Íslendingurinn á mótinu sem vann sér sæti í úrslitum en það gerðu einnig sleggjukastararnir Hilmar Örn Jónsson (sjöundi) og Guðrún Karítas Hallgrímsdóttir (tólfta).

Sindri kastaði 79,21 í undankeppninni sem hefði dugað honum í hóp átta bestu í kvöld en 75,36 metra kast hans í kvöld var ekki nóg til að fá að kasta oftar.

Sindri kastaði 71,93 metra í fyrstu tilraun sinni sem var sjöunda besta kastið eftir fyrstu umferðina.

Sindri lengdi sig aðeins með því að kasta 72,79 metra í annarri tilraun en aðrir lengdu sig meira og Sindri var kominn niður í níunda sætið eftir tvær umferðir.

Sindri lengdi sig aftur í þriðja kastinu þegar hann kastaði 75,36 metra en það var ekki nóg til að ná að vera í hópi þeirra átta sem fengu þrjú köst til viðbótar. Hann endaði síðan í tíunda sæti eftir að Ítali náði að lengja sig í þriðja kasti sínu.

Í áttunda sætinu var Finninn Topi Parviainen með kast upp á 77,82 metra eða rúmum tveimur metrum lengra en Sindri.

Sindri Hrafn hafði kastað 81,90 metra á tímabilinu og var því nokkuð frá sínu besta í kvöld.