Sló bæði metið hjá körlum og konum í einni erfiðustu þrek­raun heims

„Með því að gera þetta hef ég lært að elska líkama minn aftur og vera svo þakklát fyrir það sem hann getur gert fyrir mig,“ sagði Sophie Woods.

Hún þurfti að hlaupa tvö þúsund kílómetra leið í gegnum átta lönd. Hún þurfti að hlaupa að meðaltali 63 kílómetra á dag með klifri sem jafngildir því að fara upp Mont Blanc á stærstu dögunum.

Með því að klára þetta á 29 dögum sló hún ekki aðeins kvennametið heldur einnig met karlanna. Kvennametið var 38 dagar en karlametið er 35. Hún bætti því kvennametið um níu daga og karlametið um sex daga.

Eftir að hafa gengið í gegnum árangurslausa frjósemismeðferð, þar á meðal glasafrjóvgun, segir Sophie að hún hafi viljað að „líf hennar liti öðruvísi út“.

Þegar hún ákvað að takast á við áskorunina að hlaupa Via Alpina stefndi hún á metið.

Leiðin fylgir Alpafjöllunum endilöngum með hækkun sem jafngildir því að klífa Everest-fjall tólf sinnum.

Hin 42 ára gamla kona hóf maraþonið 4. júlí á Ítalíu og fylgdi gönguleiðakerfi í gegnum Slóveníu, Austurríki, Þýskaland, Liechtenstein, Sviss og Frakkland áður en hún lauk hlaupinu á Miðjarðarhafsströndinni í Mónakó á laugardagskvöld.

„Ég er í sjöunda himni, en algjörlega úrvinda. Ég er virkilega þreytt,“ viðurkenndi hún í færslu á samfélagsmiðlum sínum.

Sophie, sem er frá Nýja-Sjálandi, og teymi hennar börðust við tvær hitabylgjur, storma, hrossaflugnasverm og gróðurelda sem leiddu til þess að hún þurfti að taka á sig krók sem bætti fimm kílómetrum og 200 metrum af hættulegri klifurhækkun við leið hennar.