Ekki erfitt að skila hagnaði í gósentíð há­vaxta­um­hverfis

Stefán birtir athugasemd á Facebook-síðu sinni undir fremur háðskri fyrirsögn: „Hetjurnar í bönkunum!“ Þar leggur hann út af frétt Vísis sem greinir frá því að Arion banki hafi hagnast um rúmar 15 milljarða það sem af er ári sem er minna en á sama tíma á síðasta ári.

Stefán vitnar í Benedikt Gíslason, bankastjóra Arion banka sem segir bankann hafa náð öllum sínum fjárhagslegu markmiðum.

„Það er nú ekki erfitt í hávaxtaumhverfinu sem Seðlabankinn færir þeim. Hagnaðurinn fer í hæstu hæðir án þess að bankamennirnir hreyfi hönd.“

Stefán segir að bankamenn hafi þrátt fyrir þetta ekki setið aðgerðalausir í gósentíð hávaxtastefnunnar, heldur aukið vaxtamuninn á innlánum og útlánum sem eykur hagnað bankanna enn frekar.

„Þeir hafa einnig hækkað vexti á íbúðalánum á þessu ári með því að setja sérstakt álag á þá sem eru með veðsetningarhlutfall umfram 50%. Þeir sem fá það álag, ofan á sögulega háa vexti umfram verðbólgu (raunvexti), eru fólkið sem þarf að skuldsetja sig meira á dýrum íbúðamarkaði. En það er fólkið sem á minni eignir fyrir og hefur lægri tekjur.

Það fólk er pínt enn frekar með hinu nýja álagi sem bankarnir tóku upp eftir vaxtadóminn á síðasta ári.“

Stefán segir ekki erfitt að vera bankastjóri í slíku umhverfi og svo fái bankastjórar bónusa fyrir þetta vegna „góðrar frammistöðu“.