Óvæntasta stjarna HM fann sér nýtt fé­lag

Vozinha, hinn fertugi markvörður Grænhöfðaeyja, sem sló í gegn með því að halda hreinu á móti verðandi heimsmeisturum Spánar í fyrsta leik, hefur komist að samkomulagi við síleska félagið Colo Colo um félagaskipti, að sögn Aníbal Mosa, forseta félagsins.

„Vozinha verður leikmaður Colo Colo. Á næstu dögum mun hann ferðast til Síle, gangast undir hefðbundna læknisskoðun og verður síðan kynntur hér á Estadio Monumental,“ sagði Mosa við staðbundna fjölmiðla, samkvæmt fréttastofunni Reuters.

Félagaskiptin hafa þó ekki formlega gengið í gegn. Colo Colo hefur þó birt kynningarmynd á X með mynd af því sem virðist vera einkennandi hárgreiðsla markvarðarins. Í færslunni stendur: „Velkominn. Við bíðum eftir þér.“

Vozinha varð einn af þeim sem mest var rætt um á heimsmeistaramótinu í sumar.

Hann hjálpaði Grænhöfðaeyjum, sem tóku þátt í fyrsta sinn, að komast í 16-liða úrslit þar sem liðið féll úr leik eftir framlengingu gegn Argentínu.

Athygli þessi leiddi til þess að markvörðurinn fór úr rúmlega þrjátíu þúsund fylgjendum á Instagram í að hafa nú tæplega þrjátíu milljónir. Colo Colo, nýja félagið hans, er bara með 2,6 milljónir fylgjenda á Instagram.