Leggur til breytingar á úti­vistar­tíma barna

Mennta- og barnamálaráðuneytið hefur birt í Samráðsgátt stjórnvalda drög að frumvarpi um breytingu á barnaverndarlögum sem varða útivistartíma barna.

Breytingarnar sem lagðar er til er meðal annars að börn á aldrinum tíu til tólf ára fái að vera á almannafæri til klukkan 21 yfir vetrartímann í stað klukkan 20 líkt og lögin segja til um núna. Börn á aldrinum þrettán til sextán ára fái áfram að vera úti án fylgdar til klukkan 22 en eftir þann tíma þurfi þau að vera í fylgd með fullorðnum eða á leið heim úr skóla-, íþrótta- eða frístundastarfi.

Einnig hyggst ráðherrann með frumvarpinu samræma útivistartímann yfir sumartímann betur að skólaárinu. Útivistartíminn yfir sumartímann verði þess í stað frá 1. júní til 1. september í stað þess að hann sé í gildi 1. maí til 1. september.

Engar breytingar hafa verið gerðar á reglum um útivistartíma barna frá árinu 1992.

„Á þeim tíma hafa aðstæður barna, félagsleg samskipti og tómstundastarf breyst verulega, ekki síst með tilkomu stafræns umhverfis. Í samráði við börn hefur ítrekað komið fram ákall um meiri sveigjanleika og rýmri útivist í takt við aukinn þroska þeirra,“ segir í samráðsgátt.