Fé­lag Höllu fær fimm­tíu milljónir í arð

Heimildin greindi fyrst frá arðgreiðslunni en Var ehf. er í 25 prósenta eigu Sunnuness ehf., sem er í helmingseigu Höllu. Hinn helmingurinn er í eigu Jóns, sem er forstjóri Veritas.

Halla hefur áður sagst ekki koma að rekstri Sunnuness með nokkrum hætti, þó hún væri annar eigendanna. Skömmu fyrir forsetakosningar 2024 sagði hún við Viðskiptablaðið að Jón stýrði alfarið félaginu.

Í ársreikningi félagsins fyrir 2025 kemur fram að eigendur Vars hafi samþykkt 200 milljóna króna arðgreiðslu. Félag Höllu fær því 50 milljónir króna í arðgreiðslu. Aðrir hluthafar eru félögin Dalsárós, Granat og Viti fjárfestingarfélag sem eiga hvert um sig 25 prósenta hlut og fá því einnig 50 milljónir króna í arð.

Í fyrra greiddu eigendur Vars sér út 800 milljónir króna í arð samkvæmt ársreikningi – þar af 200 milljónir til Sunnuness – vegna rekstrarársins 2024. Það ár hafði félagið selt hlut sinn í auglýsingaskiltafélögunum Billboard, BBI og Dengsa ehf.

Í dag á félagið 58,4 prósenta hlut í eignarhaldsfélaginu Northern Limit, 50 prósenta hlut í fasteignafélaginu Þorláki og 34,1 prósenta hlut í leigufélaginu Síðumúli 27 ehf. Eignarhlutir í öðrum félögum eru samtals færð á 851 milljón króna. Eigið fé er bókfært á 898 milljónir króna.

Hagnaður af rekstri Vars á árinu 2025 nam að fjárhæð 134 milljónum króna. Þetta má helst rekja til söluhagnaðar á eignarhlut í félögum og gangvirðisbreytinga eignarhluta, en einnig til vaxtartekna.

Ársreikningur Sunnuness fyrir 2025 liggur ekki fyrir. Stjórn félagsins lagði til í fyrra að greiddur yrði arður úr félaginu að fjárhæð 40 milljóna króna á árinu 2025, samkvæmt ársreikningi fyrir 2024. Gangi það eftir sem skyldi má gera ráð fyrir að 20 milljónir af því hafi runnið til forsetans, þar sem hún á helmingshlut í félaginu.