Sigur á Svíum og sæti í A-deild tryggt

Eins og svo oft áður á mótinu sýndi íslenska liðið styrk sinn í seinni hálfleik í leiknum í dag.

Svíar voru tíu stigum yfir í hálfleik, 44-34. Íslenska vörnin hrökk í gang í 3. leikhluta þar sem sænska liðið skoraði aðeins þrettán stig gegn sextán hjá því íslenska.

Íslendingar léku svo við hvern sinn fingur í lokaleikhlutanum sem þeir unnu, 34-19, og leikinn með átta stigum, 76-84.

Lars Erik Bragason var stigahæstur í íslenska liðinu með 21 stig. Ásmundur Múli Ármannsson skoraði nítján stig og Magnús Dagur Svansson og Viktor Jónas Lúðvíksson skoruðu sitt hvor ellefu stigin. Magnús tók einnig níu fráköst og Viktor átta. Magnús varði enn fremur sex skot.

Ísland er sem fyrr sagði öruggt með sæti í A-deild Evrópumótsins en þangað komast þrjú efstu liðin í B-deildinni.

Íslendingar ljúka keppni á EM annað kvöld þegar þeir mæta sigurvegaranum úr leik Úkraínumanna og Portúgala í úrslitaleik.