Hamilton klessti og Ferrari í kapp­hlaupi við tímann

Hamilton átti fimmta hraðasta hring æfingarinnar í morgun en undir lokin fór hann út af brautinni. Hann missti stjórn í þrettándu beygju Spa brautarinnar og fór utan í vegkant með hægra afturhjólið, sem beyglaðist illa.

Pierre Gasly, ökumaður Alpine, klessti sinn bíl með svipuðum hætti í sömu beygju í gær.

„Ég er búinn að rústa bílnum, maður,“ sagði Hamilton í liðsútvarpi Ferrari eftir áreksturinn og baðst fyrirgefningar.

Áreksturinn reyndist þó ekki alveg svo alvarlegur, en bíllinn skaddaðist sannarlega.

Kimi Antonelli, ökuþór Mercedes og efsti maður heimslistans, náði besta tímanum í morgun eins og á æfingunni í gær. Hann þykir líklegastur til að hreppa ráspólinn þegar formleg tímataka fyrir kappakstur morgundagsins fer fram á eftir.

Tímatakan fyrir Formúlu 1 kappaksturinn í Belgíu hefst klukkan 13:55 á Sýn Sport.