Haf­þór Júlíus gefst ekki upp þrátt fyrir von­brigðin

Hafþór reyndi við nýtt heimsmet á fyrstu Enhanced Breakers-keppninni í Los Angeles en hún er hluti nýrrar viðburðaraðar þar sem fremstu íþróttamenn heims munu reyna að slá heimsmet með því að nota frammistöðubætandi efni.

Hafþóri hafði mistekist að lyfta 515 kílóum á Steraleikunum þegar hann ætlaði að slá heimsmetið um fimm kíló en það var fyrr í sumar. Hafþór fór aðeins varlegar núna og reyndi að bæta heimsmetið aðeins um eitt kíló. 

511 kílóin fóru þó ekki á loft hjá honum sem voru vonbrigði fyrir bæði hann, mótshaldara og aðdáendur hans.

Hafþór sýndi þessa misheppnuðu heimsmetstilraun sína á samfélagsmiðlum sínum en það er enginn uppgjafartónn í þessum 37 ára kappa. 

„Þér mistekst aðeins þegar þú hættir að reyna. Ég er ekki hættur. 511 kg munu fara upp!“ skrifaði Hafþór.

Hann hafði áður tjáð sig um vonbrigðin. „511 kg. Ég klikkaði. Grillið mig í athugasemdunum, ég á það skilið,“ skrifaði Hafþór strax eftir að lyftan mistókst.