Þungt tap gegn Tyrkjum og Svíar bíða

Ísland vann frábæran 86-79 sigur gegn Ítalíu þegar riðlakeppninni lauk í gær, eftir að hafa áður unnið Serbíu í fyrsta leik en tapað fyrir Póllandi. Þetta er í fyrsta sinn sem Ísland vinnur tvo leiki í A-deildinni.

Slagurinn við Tyrki í dag reyndist hins vegar of erfiður, þrátt fyrir að Ísland væri reyndar 21-19 yfir eftir fyrsta leikhluta.

Tyrkir fóru á kostum í 2. leikhluta og unnu hann 29-13, og höfðu því 14 stiga forskot í hálfleik, 48-34. Tyrkland hélt svo áfram að bæta við það forskot í þriðja leikhluta og komst í 76-48 fyrir lokaleikhlutann, þar sem Ísland náði aðeins að klóra í bakkann.

Leikinn mátti sjá í beinu streymi á Youtube.

Nú er ljóst að Ísland spilar um 9.-16. sæti á mótinu en liðið spilar við Svíþjóð í næsta leik á föstudaginn. Tyrkland fer hins vegar áfram í 8-liða úrslitin.

KR-ingurinn Rebekka Rut Steingrímsdóttir var stigahæst hjá Íslandi í dag með 15 stig en hún gaf líka þrjár stoðsendingar og tók eitt frákast. 

Hin 16 ára Berglind Katla Hlynsdóttir skoraði 14 stig, tók þrjú fráköst og gaf þrjár stoðsendingar. Arndís Rut Matthíasdóttir tók flest fráköst eða 13 talsins en tölfræðina úr leiknum má finna hér.