„Komið með þessa NBA karla, við erum klárir“

„Ég er hrikalega ánægður. Ég gæti eiginlega ekki verið ánægðari. Þetta var þvílíkur karakterssigur í erfiðum leik. Það er geggjað að hafa náð að landa þessu,“ sagði Baldur Þór í samtali við RÚV eftir leik.

Spurður hvernig honum hafi liðið þegar allt var í járnum í blálokin sagði Baldur Þór:

„Þetta var bara það sama og alltaf í þessum bransa. Allir að keppa á fullu, allir inni í leiknum. Allir sem koma að liðinu að gera sitt til að reyna að sigra leikinn. Allir með hausinn á réttum stað.“

Fullt í boði til að vera litli karlinn

Ísland átti erfitt uppdráttar í fyrri hálfleik en óx ásmegin í þeim síðari.

„Varnarleikurinn var betri í seinni. Það er það sem var lykilatriði í þessu. Svo settum við erfið skot. Það voru fullt af erfiðum hlutum í þessum leik. Við töpuðum mikið af boltum og strögglum varnarlega, sérstaklega í fyrri hálfleik og erum meira að segja líka að klúðra vítum.

Það er fullt þarna í boði til þess að vera litli karlinn en þetta var bara karakter. Það var mótlæti, þetta var erfitt. Enginn sem kom að teyminu gafst upp eða var lítill í sér. Við bara náðum að sækja þetta,“ sagði hann um hvað hafi breyst á milli hálfleikja.

Ísland mætir Serbíu, Tyrklandi og Bosníu og Hersegóvínu í seinni umferð undankeppninnar.

„Komið með þessa NBA karla, við erum klárir,“ sagði Baldur Þór Ragnarsson að lokum í samtali við RÚV.