Ný lið bætast við

Alls verða 12 lið í 1. deild kvenna á komandi tímabili, sem er metfjöldi. Þar af eru níu aðallið en þrjú B- eða U-lið taka einnig þátt. Breiðablik og Skallagrímur snúa aftur í deildina eftir nokkurra ára fjarveru og Þór Þorlákshöfn mætir einnig til leiks eftir að samstarfi félagsins við Hamar í meistaraflokki kvenna lauk.

Slitin á samstarfi Hamars og Þórs Þorlákshafnar hafa einnig áhrif á efstu deild, en í kjölfarið tekur Ármann sæti þeirra í Bónusdeild kvenna og heldur þar með sæti sínu í deildinni frá síðasta tímabili.

Í 1. deild karla tekur Hamar við sæti Fylkis. Fylkismenn ákváðu að færa lið sitt niður í 2. deild eftir eins árs veru í 1. deild og því heldur Hamar sæti sínu þrátt fyrir að hafa endað í neðsta sæti deildarinnar á síðasta keppnistímabili.

Áfram verða 18 lið í 2. deild karla og þar vekur athygli að nokkur ný félög hafa skráð sig til leiks. Þar má nefna Augnablik, Íþróttafélag Breiðholts, Mána, Reyni Sandgerði, Smára Varmahlíð og Víði í Garði. Sum þessara félaga eru að taka þátt í deildarkeppni á ný eftir langt hlé en önnur stíga sín fyrstu skref í deildarkerfi KKÍ.