Mikill niður­skurður á skrif­stofu borgar­stjóra

„Borgarráð samþykkti í dag umfangsmiklar skipulagsbreytingar á skrifstofu borgarstjóra og borgarritara. Tillögurnar eru liður í markmiðum stýrihóps meirihlutans um hagræðingu og stjórnkerfisbreytingar hjá Reykjavíkurborg. Markmið breytinganna er að einfalda stjórnsýslu, stytta boðleiðir, draga úr yfirbyggingu og nýta fjármuni borgarinnar betur. Um leið verði staðið vörð um framlínuþjónustu.“

Þetta segir í tilkynningu frá Reykjavíkurborg.

Eins og greint hefur verið frá var samþykkt á fundi borgarráðs í dag að leggja niður skrifstofu samskipta og viðburða hjá Reykjavíkurborg og mannréttindaskrifstofu borgarinnar. Um tuttugu manns hefur verið sagt upp.

Hópuppsögn og sparnaður

Í tilkynningu frá borginni segir að breytingarnar hafi áhrif á 27 stöðugildi af 42 á skrifstofu borgarstjóra og borgarritara en þar undir heyra skrifstofa samskipta og viðburða og mannréttindaskrifstofa. 

Níu störf eru færð milli sviða en átján störf lögð niður. Eftir því sem fram kemur er gert ráð fyrir því að ráðið verði í einhver af nýjum stöðum eftir því sem innleiðingunni vindur fram. Þá verður einhverjum verkefnum útvistað. 

„Starfsfólki skrifstofunnar mun eftir að breytingar hafa að fullu komist til framkvæmda, hafa fækkað um minnst 40%. Um hópuppsögn er að ræða og hefur Vinnumálastofnun verið upplýst,“ segir í tilkynningunni.

Borgin reiknar með að umræddar breytingar muni lækka rekstrarkostnað borgarinnar um 280 til 330 milljónir króna á ári hverju.

„Ég hét því að gera breytingar og taka til hendinni í rekstri borgarinnar. Það er eðlilegt að ég horfi fyrst til þeirra verkefna sem standa mér næst í þeim efnum, hér á skrifstofu borgarstjóra og borgarritara. Þessar ákvarðanir eru hvorki einfaldar né teknar af léttúð. Rekstur borgarinnar stendur hins vegar að óbreyttu ekki undir lögbundinni þjónustu, nauðsynlegum fjárfestingum og mikilvægu viðhaldi innviða. Þess vegna reynast þessar aðgerðir nauðsynlegar,“ er haft eftir Hildi Björnsdóttur í tilkynningunni.

Ráðast í enn fleiri aðgerðir á næstunni

Þá kemur fram að samhliða hópuppsögninni verði skerpt á ráðningarbanni og viðveruskyldu innan miðlægrar stjórnsýslu. Þá er stefnt að því að draga úr ferðalögum borgarstarfsmanna. Þá verður því fyrirkomulagi komið fyrir að ferðaheimildir þurfa að vera samþykktar af skrifstofu borgarstjóra og borgarritara.

„Gert er ráð fyrir að ofangreindar breytingar taki gildi frá og með 1. júlí nk. Á næstu vikum og mánuðum munu frekari tillögur er snúa að öðrum þáttum í rekstri borgarinnar verða kynntar af hagræðingarhópi borgarstjóra sem er að störfum.“

„Stefnumótunar- og þróunarteymi á skrifstofu borgarstjóra og borgarritara verður lagt niður og helstu verkefnum á borð við rannsóknarþjónustu, verkefnastýringu lýðheilsumála og Græna plani verður hætt. Atvinnuþróun mun færast til umhverfis- og skipulagssviðs og ytri nýsköpun til þjónustu- og nýsköpunarsviðs. Verkefni á borð við samhæfingu stefnumótunar, persónuvernd og alþjóðamál verða áfram á skrifstofunni en með breyttum áherslum,“ segir í tilkynningunni. 

Viðburðarteymi borgarinnar færist til menningar- og íþróttasviðs. Stefnt sé að því að byggja upp minna fagteymi miðlunar með áherslu á stafrænar lausnir, markaðsmál og upplýsingamiðlun. Eins og áður segir heyrir mannrétinndaskrifstofa borgarinnar sögunni til.

„Mannréttindaskrifstofa og mannréttindaráð verða lögð niður og lögbundin verkefni áfram tryggð og færð nær þeim sviðum sem sinna viðkomandi þjónustu. Borgarráð mun fara með jafnréttismál sveitarfélagsins. Verkefni sem tengjast innflytjendum, fólki af erlendum uppruna, ofbeldisvörnum og Bjarkarhlíð verða færð til velferðarsviðs. Verkefni sem snúa að hinsegin fræðslu og stuðningi við hinsegin börn og ungmenni verða færð til skóla- og frístundasviðs. Jafnframt verður stofnað öldunga- og aðgengisráð Reykjavíkurborgar sem sinnir lögbundnu samráðs- og ráðgjafarhlutverki gagnvart eldra fólki og fötluðu fólki.“

Uppfært 2. júlí

Vinnumálastofnun greindi frá því þann 2. júlí að aðeins ein hópuppsögn hefði verið á landinu í júní. Uppsögnin hjá Reykjavíkurborg hefur ekki uppfyllt skilyrði um fjölda til að teljast til hópuppsagnar.