Kynntust í janúar og kynna nýja lausn fyrir mat­væla­fram­leið­endur

Því IORDEN, sem hlaut annað sætið í lokakeppni Gulleggsins 2026, samanstendur af tveimur einstaklingum í frábæru teymi sem vinna frábærlega saman en...

... kynntust ekki fyrr en í janúar!

Þegar þau skráðu sig til leiks í hakkaþoni: Hugmyndahraðhlaupi Gulleggsins og Landsbankans.

Margeir Haraldsson Arndal býr á Flateyri. Hann segir um hakkaþonið:

Ég var að horfa á þetta sem kveikju. 

Ég hafði mikinn áhuga á nýsköpun og hugsaði frekar um að skapa mitt eigið starf en að sækja um starf hjá öðrum.“

Sunna Guðlaugsdóttir sat hins vegar við skriftir og vantaði að gera eitthvað meira.

„Ég skráði mig eiginlega bara upp á grín. Ég var að skrifa meistararitgerð og hugsaði að það væri skemmtilegt að brjóta aðeins upp námið. Svo fór þetta bara á flug,“ segir Sunna.

Í gær og í dag ræðir Atvinnulífið við teymi úr vinningshópi Gulleggsins 2026.

Smáframleiðendur, stór tækifæri

Lausnin sem IORDEN vinnur nú að snýst um að einfalda líf og starf smærri aðila í matvælaframleiðslu. Því þótt stóru fyrirtækin hafi bolmagn til að sinna öllu því gæðastarfi og skráningum sem fylgir slíkri framleiðslu er það oft hægara sagt en gert í veröld þeirra sem smærri eru.

Oft eru þetta einyrkjar eða mjög lítil fyrirtæki þar sem sami einstaklingurinn sinnir framleiðslu, sölu, markaðsmálum og öllum skráningum sem fylgja rekstrinum. Í þessum hópi eru meðal annars bændur sem selja beint frá býli og aðrir smáframleiðendur. Svo ekki sé talað um útlöndin, en meira um það síðar.

Á Hugmyndahraðhlaupi Gulleggsins og Landsbankans voru listuð upp vandamál sem þátttakendur voru beðnir um að leysa. Eitt þeirra var að finna lausn við áskorun JBT Marel um að nýta tækniþróunina til að einfalda þessa vinnu fyrir stærri og smærri aðila.

Margeir skráði sig til leiks og brunaði frá Flateyri í bæinn til að taka þátt í lausnamótinu.

Sunna ákvað að brjóta upp meistararitgerðarskrifin og taka þátt í nýju verkefni.

„Á endanum varð þetta þannig að ég hafði varla tíma til að klára meistararitgerðina, það varð svo mikið að gera í þessu!“ segir Sunna og hlær.

Sem er svo sem ekki ofsögum sagt því eftir lausnamótið umrædda fengu þau sæti í lokakeppni Gulleggsins. Þar lentu þau í öðru sæti, unnu peningaverðlaun og þátttöku í GEN-E frumkvöðlakeppninni í Riga í Lettlandi í sumar.

„Þessi keppni getur skapað mikil tækifæri fyrir okkur. Strax bara að komast í samband við réttu aðilana,“ segir Sunna.

IORDEN tók þátt í Hringiðu, viðskiptahraðli KLAKS fyrir grænar lausnir, sem lauk í maí. Þá vinnur IORDEN nú að rannsóknar- og þróunarverkefni sem spannar allt sumarið.

Ekki bara af því bara…

Oft áttar fólk sig ekki á því hversu mikilvægur tíminn er sem fer í rannsóknar- og þróunarvinnu sprotafyrirtækja í upphafi.

Sem í tilfelli IORDEN felur meðal annars í sér að tala við sem flesta.

„Við viljum að lausnin okkar sé það sem viðskiptavinurinn þarf, ekki það sem við höldum að hann þurfi,“ segir Sunna og bætir við:

Við viljum ekki gera bara eitthvað heldur viljum við gera eitthvað sem er í alvörunni þarft.“

Stefnan er að ná að ræða við sem flesta í sumar.

„Frá því í febrúar höfum við verið í stöðugu samtali við smáframleiðendur en það er með samtali sem við viljum tryggja að við séum að búa til lausn sem raunverulega er þörf fyrir,“ segir Margeir.

Þá hafa þau verið virk í að nálgast þann hóp sem lifir og hrærist í þessum geira. Ekki aðeins á vettvangi nýsköpunar heldur einnig þar sem matvælaframleiðendur koma saman til að ræða áskoranir og tækifæri greinarinnar.

Sem dæmi kynnti IORDEN hugmyndina á málþingi fyrir smáframleiðendur í Varmahlíð í Skagafirði þar sem þau áttu fjölmörg samtöl við fólk úr greininni. Þá hittu þau marga á Innovation Week í vor, þar sem þemað í þetta sinn var „Future of Food“.

Margeir og Sunna segja þessi samtöl ómetanleg og grunninn að því að skilja betur þarfir markhópsins og móta lausnina áfram.

Því þörfina á einföldun skriffinnskunnar segjast þau skilja vel. Bæði hafa reynslu af því að starfa í einyrkjarekstri. Margeir nefnir dæmi.

„Leiðinlegasti hluti minnar vinnu er bókhaldið, samningar og skriffinnska,“ nefnir hann sem dæmi en eins og þekkt er hjá smáframleiðendum er það oft einn og sami aðilinn sem þarf að sinna mjög mörgu:

Framleiðslu, sölu, dreifingu, samningum, bókhaldi, gæðastjórnun og svo framvegis.

„Að framleiðendur þurfi að eyða svona miklum tíma í skriffinnsku er vísbending um að þarna sé vandamál sem þarf að leysa. Því auðvitað á þeirra tími að fara í það sem þeir gera best: Að framleiða mat,“ segir Margeir.

Sunna segir markhóp IORDEN nokkuð skýran.

„Við viljum styðja við smáframleiðendur og upplifum IORDEN svolítið sem í sama liði og þann hóp. Við viljum tala fyrir þeirra hagsmunum en það þýðir þó ekki að við séum eingöngu að einblína á íslenskan markað, heldur horfum við einnig til smáframleiðenda í Evrópu.“

Sjálfbær framtíð

Sunna og Margeir segja tækifærin stór.

Því 99% matvælaframleiðenda í heiminum eru lítil og meðalstór fyrirtæki. Einmitt markhópur IORDEN.

Að þeirra mati getur lausnin stutt við sjálfbærari matvælaframleiðslu með því að auðvelda smærri framleiðendum að starfa og selja vörur í sínu nærumhverfi.

Þessi hópur nær langt út fyrir það að finnast aðeins í sveitum Íslands.

„Við stefnum á Evrópumarkað í náinni framtíð og í kjölfarið á því gerum við ráð fyrir að aðlaga lausnina að reglugerðum víðar.“

Sjálfbærniviðhorfið er ríkjandi almennt.

„Við viljum að fyrirtækið hafi jákvæð samfélagsleg áhrif líka. Það er mjög mikilvægt fyrir okkur. Við viljum efla byggðafestu og atvinnulíf í dreifbýli,“ nefnir Sunna sem dæmi.

Þá segir Margeir að aukin matvælaframleiðsla smærri aðila sé líka leið til að tryggja ákveðna arfleifð.

Við viljum að hefðir og nýsköpun haldist í hendur.“