Vara við um­fangs­miklum netsvikum í nafni lög­reglunnar

Í fréttatilkynningu þess efnis frá lögreglu segir að um sé að ræða skilaboð sem sögð eru vera frá umferðarlögreglunni og fólki bent á að ýta á hlekk til að greiða sekt. Aldrei hafi borist jafnmargar tilkynningar til lögreglu vegna netbrotatilrauna á jafnskömmum tíma og því megi ætla að um mjög umfangsmiklar tilraunir sé að ræða.

„Lögregla beinir þeim tilmælum til fólks að ýta aldrei á hlekki sem það fær senda. Fólki er ráðlagt að leita alltaf inn á viðurkennda síðu þess sem skilaboðin eiga að vera frá. Sektir frá lögreglu berast alltaf inn á island.is.“

Telji fólk sig hafa orðið fyrir svikum af þessu tagi og hafa tapað fjármunum sé því bent á að hafa tafarlaust samband við sinn viðskiptabanka til að fá ráðgjöf og í framhaldinu tilkynna málið til lögreglu. Þá minni lögregla á netbrotagáttina á island.is sem finna megi undir „samfélag og réttindi“. Þar sé bæði hægt að tilkynna netbrot til lögreglu sem og tilraunir til slíkra brota.