Sjáðu sigurkörfuna í ó­væntum sigri Elvars og fé­laga á Real Madrid

Elvar Már Friðriksson og félagar í La Laguna Tenerife, sem voru áttunda og síðasta liðið inn í úrslitakeppnina, unnu þá útisigur á deildarmeisturum Real Madrid.

Þetta var í fyrsta sinn í átján ár sem lið í áttunda sæti nær að vinna útisigur á deildarmeisturunum en það gerðist síðast 2008.

Það lið sem fyrr vinnur tvo leiki kemst áfram í undanúrslit og næsti leikur er á heimavelli Tenerife.

Jaime Fernández var hetja La Laguna Tenerife því hann skoraði sigurkörfuna með þriggja stiga skoti örfáum sekúndum fyrir leikslok. 

Real Madrid var sjö stigum yfir, 96-89, þegar fjörutíu sekúndur voru eftir af leiknum en Elvar og félagar unnu þessar fjörutíu sekúndur með átta stigum, 9-1.

Fernández skoraði sex af þessum níu stigum á síðustu mínútu leiksins en hér fyrir neðan má sjá sigurkörfuna. Hann endaði með sautján stig á tæpum fjórtán mínútum í leiknum.

Elvar lék í tólf mínútur í leiknum og var með 4 stig og 3 stoðsendingar á þeim. Tenerife vann með þremur stigum þegar hann var inni á vellinum.