Björg­vin Haf­þór snýr aftur í Skalla­grím

Björgvin hefur á undanförnum árum aflað sér dýrmætrar reynslu og er talinn styrkja lið Skallagríms verulega fyrir komandi verkefni. Auk þess að vera kraftmikill leikmaður á vellinum býr hann yfir leiðtogahæfileikum sem félagið vonast til að muni nýtast yngri leikmönnum hópsins.

„Ég hef þekkt Bjögga frá því ég teymdi undir honum sem litlum dreng í sveitinni, spilaði með honum hans fyrstu meistaraflokksleiki og mig hlakkar mikið til að fá að þjálfa hann í vetur. Hann á eftir að koma með mikla reynslu og kraft inn í hópinn,“ segir Pálmi Sævarsson, þjálfari Skallagríms, í yfirlýsingu frá Sköllunum, en liðið hafnaði í 6.sæti 1.deildarinnar í vetur.

Björgvin segist sjálfur afar ánægður með að vera kominn aftur til félagsins.

„Ég er mjög spenntur að vera kominn aftur í Skallagrím. Ég á góðar minningar frá fyrri tíma mínum hjá félaginu og hlakka til að hitta bæði strákana og stuðningsfólkið aftur. Ég fer inn í tímabilið með það hugarfar að leggja hart að mér á hverjum degi, hjálpa liðinu eins mikið og ég get og halda áfram að bæta mig sem leikmaður. Vonandi getum við byggt upp sterkan hóp sem er byggður upp á heimamönnum og átt gott tímabil saman,“ segir Björgvin sem hefur verið á mála hjá ÍR-ingum síðustu tvö tímabil.

Skemmtileg tenging fylgir endurkomu hans í Borgarnes. Þegar Björgvin lék síðast með Skallagrími þjálfaði hann 9. og 10. flokk félagsins. Nú eru margir þeirra leikmanna orðnir liðsfélagar hans í meistaraflokki.