Setti nýtt heims­met ör­fáum dögum eftir svekkelsið á Steraleikunum

Hafþór Júlíus tók þátt í Swaglyft-aflraunadeginum í Liberec í Tékklandi um helgina og tókst þar að bæta í safnið nýju glæsilegu heimsmeti.

Á Steraleikunum ætlaði Fjallið sér að fara upp með 515 kíló en heimsmetið átti hann sjálfur frá því að hann lyfti 510 kílóum á síðasta ári.

Í keppni helgarinnar var þó ekki á ferðinni fyrrnefnt heimsmet í réttstöðulyftu eins og hann reyndi við í Vegas heldur annars konar réttstöðulyftumet.

Hafþór setti heimsmetið í Tékklandi með því að lyfta 400 kílóum sjö sinnum í röð.

Heimsmetið var því í endurtekinni réttstöðulyftu, „deadlift for reps“ eins og það er kallað á enskri tungu. Enginn annar hefur náð að lyfta slíkri þyngd sjö sinnum í röð.

„Takk til allra aðdáenda minna í Tékklandi. Andrúmsloftið í dag var magnað,“ skrifaði Hafþór Júlíus á samfélagsmiðla sína.

„Einnig miklar þakkir til Tomas Holman og allra sem komu að Swaglyft-aflraunadeginum fyrir gestrisnina. Viðburðurinn var ótrúlegur,“ skrifaði Hafþór. Hann var ekki eini Íslendingurinn á svæðinu.

„Síðast en ekki síst, takk til vina minna og teymis sem ferðuðust að heiman til að styðja mig. Ég hefði ekki getað þetta án ykkar,“ skrifaði Hafþór eins og sjá má hér fyrir neðan.