Grinda­vík endursemur við fjóra leik­menn: Beeman á­fram í gulu

Þær Abby Beeman, Hulda Björk Ólafsdóttir, Ólöf Rún Óladóttir og Þórey Tea Þorleifsdóttir hafa allar ákveðið að taka slaginn með Grindvíkingum á næsta ári.

Abby Beeman kom til Grindavíkur fyrir síðasta tímabil og var kjörin verðmætasti leikmaður liðsins á lokahófi Grindvíkinga um helgina. Hún var að meðaltali með 21.9 stig og 10.0 stoðsendingar í leik.

Hulda Björk spilaði ekkert á síðasta tímabili en er að komast aftur af stað eftir meiðsli.

Ólöf Rún sneri aftur til Grindavíkur frá Keflavík árið 2023 og var í stóru hlutverki á síðasta tímabili.

Þórey Tea er á sínu þriðja tímabili hjá Grindavík og spilaði að meðaltali tvöfalt fleiri mínútur á síðasta tímabili en tímabilinu þar áður.

Grindavík hefur komist í bikarúrslitin og úrslitakeppni deildarinnar síðustu tvö ár. Á nýafstöðu tímabili féll liðið út eftir oddaleik gegn Njarðvík í undanúrslitum.

Þorleifur Ólafsson lét af störfum þjálfara eftir tímabilið og leitin að eftirmanni hans stendur yfir.

Samkvæmt heimildum Vísis er Pétur Már Sigurðarson í samningsviðræðum við Grindavík.