Þrír ætt­liðir Íslandsmeistara: „Nú þarftu fimm í við­bót til að ná mér“

Njarðvík varð Íslandsmeistari kvenna í körfubolta á sunnudagskvöldið var eftir sigur á Haukum í IceMar-höllinni í Reykjanesbæ.

Í liði Njarðvíkur er hin 18 ára gamla Sara Björk Logadóttir sem varð Íslandsmeistari í fyrsta sinn. Faðir hennar og afi fylgdust með úr stúkunni.

„Þetta var ótrúlega gaman. Þetta er ólýsanleg tilfinning einhvern veginn,“ segir Sara sem þurfti að fara í stærðfræðipróf daginn eftir titilfögnuðinn og kláraði þar með prófatörnina í FS.

„Þetta var svolítið meira stress en ég hélt að vera pabbi uppi í stúku. Það var smá svona pabbastress,“ segir faðir Söru, Logi Gunnarsson, sem varð Íslandsmeistari með Njarðvík um aldamótin.

Umrætt pabbastress er eitthvað sem faðir Loga, Gunnar Þorvarðarson, margfaldur Íslandsmeistari með Njarðvík á níunda áratugnum, þekkir vel.

„Já, já. Ég var með það þegar Logi var að spila. Það fylgdi manni alltaf,“ segir Gunnar léttur.

Sagan skrifuð

Gunnar hóf sigurgönguna og var hluti af liði Njarðvíkur sem vann fyrsta Íslandsmeistaratitil í sögu félagsins árið 1981.

Hann fylgdi því eftir með fjórum titlum til, árin 1982, 1984 og 1985. Þá var hann aðstoðarþjálfari liðsins sem varð meistari árið 2006.

Það var löng leið að fyrsta titlinum sem hóf mikla sigurgöngu Njarðvíkinga.

„Við runnum alltaf á rassinn síðustu metrana þar til við náðum í fyrsta titil félagsins 1981. Það var ógleymanlegt,“ segir Gunnar.

Svipaða sögu má segja af syni hans og sonardóttur. Logi fór upp alla yngri flokkana án Íslandsmeistaratitils og Sara líka. Það var því þrautaganga að fyrsta titlinum hjá þeim báðum.

Koma að ráðum hér og þar

45 árum síðar er þriðji ættliðurinn úr fjölskyldunni orðinn Íslandsmeistari. En hvernig finnst Söru körfuboltapabbinn Logi?

„Hann er bara geggjaður sko. Hann gefur mér alltaf ráð fyrir leiki. Það er gott að hafa hann,“ segir Sara. Faðir hennar segist fara varlega í sakirnar.

„Maður passar sig að gera ekki of mikið og skipta sér ekki of mikið af. Maður þarf að fara varlega að þessu og pota inn ráðum hér og þar,“ segir Logi.

Það var svipað hjá Gunnari gagnvart Loga.

„Já, ég gerði það á sínum tíma. En ég er reyndar ekki mikið að böggast í Söru. En svona eitt og eitt atriði sem ég skýt að henni. En ég læt pabbann bara um það,“ segir Gunnar.

Ekki sjálfgefið

Logi vann á sínum tíma þrjá Íslandsmeistaratitla, árin 1998, 2001 og 2002. Hann segist hafa verið að eltast við að ná sex titlum líkt og faðir hans.

„Ég sagði það við Söru eftir leikinn, að ég fór þarna þrjú ár í röð, fyrstu þrjú árin mín og mér fannst þetta svo eðlilegt og taldi það eðlilegan hlut að fara í lokaúrslit og vinna þau,“ segir Logi sem fór í kjölfarið utan í atvinnumennsku áður en hann sneri heim til Njarðvíkur árið 2013 og spilaði til ársins 2023.

Titillinn sem hann vann 21 árs gamall árið 2002 reyndist hins vegar hans síðasti.

„Ég fór aldrei aftur í lokaúrslitin og hef ekkert unnið síðan þá. Maður á þess vegna að njóta þess og ég sagði það við hana, maður veit aldrei hvenær þetta kemur aftur. Ég var að elta hann en náði honum ekki,“ segir Logi.

Þarf Sara þá ekki að stefna að því, að gera það sem föður hennar tókst ekki?

„Jú, er það ekki bara planið?“ segir Sara og hlær. Logi grípur orðið:

„Við getum lagt titlana saman, við erum komin með fjóra og eigum bara tvo eftir til að jafna hann.“

„Ég hvíslaði því nú að henni þegar ég var að faðma hana: Nú þarftu fimm í viðbót til að ná mér,“ segir Gunnar.

Innslagið úr Sportpakka gærkvöldsins má sjá í spilaranum efst.