„Það er komin pressa“

Liðin mætast í öðrum leik úrslitaeinvígis Bónus deildar karla í Síkinu í kvöld. Grindavík marði 85-80 sigur í fyrsta leiknum eftir frábæran fyrri hálfleik. Tindastóll átti gott áhlaup í seinni hálfleik og var nálægt því að stela sigrinum en tókst það á endanum ekki.

„Mér leið vel eftir fyrsta leikinn. Við byrjuðum illa og grófum okkur í smá holu en svo fundum við einhvern takt. Mér fannst við vera komnir með smá tök á þeim, þannig að eftir leikinn hugsaði ég bara hvað við gætum tekið margt gott úr þessu yfir í næsta leik,“ sagði Sigtryggur Arnar fyrir leik kvöldsins.

„Við vorum ekki að hitta úr skotum. Við vorum að tapa boltanum alltof auðveldlega. Við vorum að gefa frá okkur sóknarfráköst. Þetta eru hlutir sem er frekar auðvelt að laga og ég held að við séum á fínum stað,“ bætti Sigtryggur við.

Grindavík gerði ekkert óvænt, Stólarnir voru bara slakir

Grindavík var með fimmtán stiga forystu í hálfleik í síðasta leik. Á þeim tímapunkti leit út fyrir að Grindvíkingar myndu vinna öruggan sigur en Sigtryggur segir ekkert hafa komið honum á óvart í upplegi Grindavíkur. Stólarnir hafa bara ekki mætt nógu gíraðir til leiks.

„Við vorum bara svo hikandi, við vorum sjálfir ekki klárir. Það kom ekkert á óvart, við vissum að þeir myndu mæta með mikla orku og spila þessa skiptivörn sem er erfitt að sækja á, sérstaklega ef þú ert hikandi. Það kom mest á óvart hvað við mættum illa í leikinn sjálfir.“

Líður best undir pressu

Tindastóll er 1-0 undir og verður í mjög slæmri stöðu ef liðið tapar á heimavelli í Síkinu í kvöld. Sigtryggur segir tapið í síðasta leik hafa verið sárt en honum líður jafnvel betur undir pressu.

„Við viljum finna fyrir pressu, það nær allavega því besta úr mér. Ef það er engin pressa þá finnst mér erfiðara að gíra mig upp í leiki en ef það er pressa þá næ ég fullum fókus. Ég veit hvað ég þarf að gera og það gefur mér aukaorku þegar það er pressa. Það er komin pressa og það er pressa sem við viljum hafa á okkur.“

Það ætti þá að hjálpa Sigtryggi að Sauðárkrókur er einhver körfuboltaóðasti bær landsins og bæjarbúar setja mikla pressu á Tindastólsliðið.

„Maður finnur hvað þetta skiptir marga miklu máli. Maður getur haft áhrif á líf fólksins í bæjarfélaginu. Maður finnur hvað þetta er mikilvægt og það er það sem mér finnst skemmtilegast við þetta.“

Viðtalið má sjá í spilaranum að ofan en nánar verður rætt við Sigtrygg Arnar í Sportpakka Sýnar um leik kvöldsins og meiðslin sem hann hefur verið að glíma við en segist hafa náð sér hundrað prósent af. 

Leikur Tindastóls og Grindavíkur verður svo í beinni útsendingu á Sýn Sport Ísland frá 18:30.