„Getum ekki mætt værukærar í næsta leik“

Leikurinn var afar jafn og spennandi allan tímann en Njarðvík skoraði sjö síðustu stigin í leiknum og vann að lokum fimm stiga sigur, 75-70.

Dani gat eiginlega ekki svarað því hvernig Njarðvíkingum tókst að kreista sigurinn fram í jöfnum leik.

„Ég er hreinlega ekki viss! En mér fannst við spila frábæra vörn en Haukar eru með marga leikmenn sem geta ógnað sóknarlega. Við náðum að stilla okkur vel inn í vörninni, náðum nokkrum stórum varnarfráköstum og settum svo nokkur stór skot. Þetta var leikur sem reyndi vel á og ég held að bæði lið séu algjörlega uppgefin.“

Varnarleikur Njarðvíkur var traustur í kvöld, þá sérstaklega undir lokin, og Dani sagði að Njarðvíkingar hefðu lært mikið af síðustu seríu um það hvernig það á að spila vörn gegn öflugu sóknarliði.

„Við komum bara með hausinn rétt stilltan. Serían gegn Grindavík hjálpaði okkur að finna taktinn varnarlega því þær eru líka með marga góða sóknarmenn og við þurftum að setja fulla einbeitingu á varnarleikinn og mér finnst það hafa skilað sér áfram í þetta einvígi. Að setja fullan fókus á harða og líkamlega vörn.“

Stóru skotin duttu Njarðvíkurmegin að þessu sinni.

„Ég held að við höfum bara sett fleiri stór skot en þær. Stundum rúllar boltinn ofan í og stundum rúllar hann upp úr, og við hittum bara aðeins betur en þær í lokin.“

Brittany Dinkins var frábær í liði Njarðvíkur í kvöld, skoraði 30 stig og bætti við níu fráköstum og þremur stoðsendingum. Andri spurði Dani hvernig það væri að spila með leikmanni eins og Britt.

„Það er magnað. Ég spilaði á móti henni hérna á Íslandi fyrir mörgum árum. Hún er ótrúlegur leikmaður og gerir mér auðveldara fyrir á vellinum og ég vona að ég geri það sama fyrir hana og það hefur verið algjörlega magnað að spila með henni.“

Njarðvíkingar eru í algjörri lykilstöðu í einvíginu eftir sigurinn í kvöld og aðeins einum sigri frá titlinum en Dani er ennþá með báða fætur á jörðinni.

„Við þurfum bara að vinna einn leik enn en við getum ekki mætt værukærar í næsta leik. Haukar spiluðu betur í kvöld en í síðasta leik og ég reikna með þeim enn betri í næsta leik. Við þurfum bara að einbeita okkur að einum leikhluta einu og fimm mínútum í einu í næsta leik.“