Arnar: Ákefðin var til staðar en hún var ekki á réttum hlutum

„Bara léleg uppsetning í byrjun hjá mér. Við vorum svo ragir sóknarlega þar sem við töpuðum mikið af boltum sem enduðu í auðveldum körfum fyrir þá“, sagði þjálfarinn þegar hann var spurður hvað gerðist hjá Tindastól sem varð til þess að þeir voru 15 stigum undir í hálfleik.

Hann var þá spurður að því hvað breyttist hjá hans mönnum í seinni hálfleik en Tindastóll komst yfir í lok þriðja leikhluta og allt gat gerst.

„Við breyttum bara planinu heilt. Ákefði varð meiri og þá varð þetta skömminni skárra.“

Er það þá ákefðin sem Tindastóll þarf að passa upp á að sé í toppi frá byrjun í næsta leik.

„Ákefðin var til staðar en hún var ekki á réttum hlutum. Við þurfum að vera aðeins skynsamari. Við erum að spila hratt en við þurfum líka að vera þolinmóðir á köflum. Ég held að við séum með 16 tapaða bolta sem verða að sniðskotum hinum megin. Þannig að við þurfum að passa það. Svo þurfum við bara að skoða það sem við þurfum að gera betur.“

Arnari fannst ekkert skrýtið að hann væri að fara sparlega með Adomas Drungila, sem hefur spilað í stuttum köflum í úrslitakeppninni.

„Hann spilar 25 mínútur. Hann er 206 cm og 30 og eitthvað ára. Það er bara erfitt að hreyfa þetta og við viljum frekar hafa hann kraftmikinn á meðan hann er inn á. Svo gekk bara vel þegar við vorum litlir með Ragga og Taiwo.“

Í lokin var Arnar spurður út í Davis Geks sem fékk úr litlu að moða og hvort það væri eitthvað sem þyrfti að hafa áhyggjur af.

„Við þurfum bara að fá betri skot heilt yfir. Ég held að það sé málið. Það skiptir ekki máli hver fær skotin. Það er ekki það sem við erum að pæla í, bara að við séum að búa til góð skot.“