Óli Óla: Mér líður vel í Skaga­firðinum líka

Ólafru skoraði 21 stig, hitti úr sjö af níu skotum sínum, stal fjórum boltum og varði eitt skot á mikilvægu augnabliki. Hvað voru Grindvíkingar samt að gera rétt sem heild?

„Varnarleikur fyrst og fremst. Svo vorum við að hitta skotunum okkar, við fengum fullt af opnum skotum en gerðum okkur erfitt fyrir. Þegar við slökum á þá kemur frábært lið eins og Tindastóll til baka. Þetta var hörkuleikur. Vörnin og sóknin bara flott í dag.“

Óli setti niður 6/8 þriggja stiga skotunum sínum og var hann spurður að því hvort það hafi verið staðreyndin að hann gisti í húsinu sínu í Grindavík sem hafi gert gæfumuninn eins og hann ræddi við Vísi um fyrr í dag.

„Já örugglega. Ég ætti kannski að gista oftar. Mér líður vel í Skagafirðinum líka. Mér finnst Skagafjörðurinn fallegasti staður á landinu fyrir utan Grindavík. Ætli það sé ekki bara gistingin í nótt. Ég elska þennan stað og ég elska þetta fólk og þetta samfélag.“

Hvað gerist nú á milli leikja?

„Bara endurheimt og að anda. Slaka bara á og fara yfir hlutina. Svo er það bara næsti leikur.“

Að lokum var Ólafur beðinn um að leggja mat á mikilvægi þess að ná í fyrsta sigurinn.

„Það er bara mjög mikilvægt. Að verja heimavöllinn og komast yfir. Ég er bara mjög sáttur með þetta.“