Titillinn undir: „Bæði lið hafa spilað feyki­lega vel“

Valur og FH hafa skipst á sigrum í úrslitaeinvíginu og bæði unnið sína heimaleiki, tvo hvert. Það er því komið að oddaleik um titilinn í kvöld. Því fylgja væntanlega taugar?

„Þetta er aðallega tilhlökkun. En auðvitað er spenna í mannskapnum, annað væri mjög óeðlilegt. Þetta er auðvitað stórleikur og mikið húllumhæ í kringum leikinn. Við reynum að stilla spennuna rétt, orkuna rétt. Mætum fullir tilhlökkunar til leiks og ætlum að gera vel,“ segir Ágúst.

FH vann síðasta leik liðanna í Kaplakrika á mánudagskvöldið var. Sá leikur var mikil skemmtun og þurfti að tvíframlengja hann til að knýja fram sigurvegara. Valur hafði verið í eltingaleik allan leikinn og komst ekki yfir í fyrsta sinn fyrr en í framlengingunni.

Var erfitt fyrir Valsmenn að hrista það af sér?

„Menn voru fúlir þarna um kvöldið en svo höfum við nýtt tímann til að stilla okkur aðeins betur af og fínpússa lítil atriði. Leikurinn var gríðarlega vel leikinn af báðum liðum, mér fannst þetta frábær handboltaleikur og ég á bara von á því að við mætum vel tilbúnir í leikinn í kvöld og eflaust FH-ingarnir líka. Ég held að þetta verði járn í járn eins og þetta er búið að vera. Bæði lið hafa spilað feykilega vel og vonandi náum við að lenda þessu yfir línuna okkar megin í kvöld,“ segir Ágúst.

En hvar vinnst leikur kvöldsins?

„Það er voða auðvelt og einfalt að segja að þetta ráðist á vörn og markvörslu sem er alltaf mjög stór faktor í þessu. Við þurfum að vera aðeins betri varnarlega í 60 mínútur. Ef við náum upp okkar vörn og fáum Bjögga í gang er ég vongóður um að við náum að landa þessu.“

Leikur Vals og FH hefst klukkan 19:30 í kvöld að Hlíðarenda. Honum verður lýst beint á Vísi.