„Það yrðu gríðar­leg von­brigði ef svo væri“

Fjallað var um það á RÚV fyrr í dag að flugi Icelandair hefði verið aflýst með stuttum fyrirvara vegna þess að ekki tókst að manna áhöfn fyrir flugið. 

Icelandair og FÍA eiga í kjaraviðræðum og fór fyrsti fundur fram hjá ríkissáttasemjara í dag. Næsti fundur er boðaður á fimmtudag en deilunni var um miðjan marsmánuð vísað til ríkissáttasemjara. Fyrsti fundur fulltrúa Icelandair með FÍA og Flugvirkjafélagi Íslands fór fram hjá embætti ríkissáttasemjara í dag. Kjarasamningar Icelandair við flugmenn og flugþjóna runnu út 30. september. 

„Ég veit að þetta tiltekna flug féll niður því það vantaði flugmenn á það,“ segir Jón Þór Þorvaldsson hjá FÍA í samtali við Vísi. Hann viti ekki hvaðan sú hugmynd RÚV komi að þessi aflýsing tengist kjaraviðræðunum.

„Það eru engar aðgerðir í gangi á vegum FÍA,“ segir hann.

„Þetta er ekkert tengt samningum hjá Flugfreyjunum. Flugmenn og flugvirkjar eru komnir til [sáttasemjara] svo mér þykir líklegt að það sé verið að vísa í það en ég get allavega sagt að þetta er ekki frá okkur komið,“ segir Berglind Kristófersdóttir, formaður Flugfreyjufélags Íslands.

Forstjórinn segir óskynsamlegt að valda félaginu tjóni

„Við trúum því ekki að þetta tengist ekki með einhverjum hætti vegna þess að það er svo óskynsamlegt að við starfsfólkið séum að valda fyrirtækinu tjóni og okkar viðskiptavinum óþægindum, ekki síst á þessum tímum þegar aðstæður eru mjög krefjandi í flugrekstri út af tvöföldun á eldsneytisverði.

Þannig að við teljum að svo sé ekki allavega. Það yrðu gríðarleg vonbrigði ef svo væri, en við teljum engar líkur á því að þetta séu einhver samantekin ráð eða eitthvað þess háttar. Þetta hlýtur að vera eitthvað tilfallandi,“ segir Bogi Nils Bogason forstjóri í samtali við fréttastofu.

Viðræður við flugþjóna ganga betur

Aflýsingar vegna áhafnaskorts séu mjög sjaldgæfar hjá Icelandair. Bogi bætir við að farþegum sem áttu sæti með umræddu flugi hafi verið komið á leiðarenda með öðrum leiðum.

„En auðvitað lendir þá einhver kostnaður á félaginu við það og óþægindi fyrir viðkomandi farþega að fara ekki á þeim tíma sem þeir ætluðu.“

Þetta atvik komi ekki til með að hafa nein tilfallandi áhrif á aðrar flugferðir Icelandair.

Icelandair á einnig í kjaraviðræðum við Flugfreyjufélag Íslands og segir Bogi að það samtal sé á betri stað en hjá flugmönnum og flugvirkjum.

„Þær viðræður eru á ágætisstað meðan það gengur hægar í hinum. En við vonumst til þess að það fari að koma hreyfing á þær líka.“

Berglind hjá Flugfreyjufélagi Íslands tekur undir að það eigi í ágætis samtali við fulltrúa flugfélagsins.