„Leið eins og við værum búnir að vinna þenna leik svona fimm sinnum“

FH-ingar voru með bakið upp við vegg fyrir leik kvöldsins og þurftu sigur til að tryggja sér oddaleik um Íslandsmeistaratitilinn. Þrátt fyrir að hafa verið yfir nánast allan leikinn þurftu FH-ingar þó tvær framlengingar til að knýja fram eins marks sigur, 37-36.

„Tilfinningin er náttúrulega bara rosalega góð. Mér leið eins og við værum búnir að vinna þennan leik svona fimm sinnum, en við náðum alltaf að missa það niður,“ sagði Daníel í leikslok.

„En það gerir það bara sætara að hafa klárað þetta svona og bara geggjað að fá oddaleik á fimmtudaginn,“ bætti Daníel við.

Þegar allt er talið saman þurfu liðin að spila áttatíu mínútna langan handboltaleik í kvöld og af þeim voru FH-ingar í forystu í um 75 mínútur. Daníel segir það mikinn karakter að liðið hafi alltaf haldið áfram, þrátt fyrir að missa svo gott sem unnin leik niður í framlengingar.

„Það er rosalega sterkt. Það hefði verið auðvelt að brotna í eitthvað af þessum skiptum, en við sýndum góðan karakter og náðum að klára þetta.“

Eins og áður segir reyndist Daníel hetja FH-inga þegar hann varði víti á lokasekúndunum. Hann hefði hins vegar auðveldlega getað reynst skúrkurinn, því það var hann sem fékk dæmt á sig vítið. Hann segist þó ekki hafa verið að reyna að stela fyrirsögnum með því að fá á sig dæmt víti og verja það síðan.

„Nei, alls ekki. Ég hef bara aldrei séð þessa stöðu koma upp í handbolta áður. Ég var inni í teig og það er skrýtið að ég fari ekki í boltann. Ég veit bara ekki hvernig reglurnar eru með þetta. En jú, þetta gerir sigurinn kannski bara ennþá sætari.“

FH og Valur þurfa nú að mætast í oddaleik um Íslandsmeistaratitilinn að Hlíðarenda næstkomandi fimmtudag. Daníel segir engan leikmann hafa tíma til að finna fyrir þreytu.

„Það er enginn að pæla í þreytu í svona úrslitaeinvígi í oddaleik. Það er skemmtilegt að hafa stutt á milli og nú er bara að fylla Valsheimilið,“ sagði Daníel að lokum.