Fyrstur til að hlaupa mara­þon á undir tveimur klukku­stundum

Sawe, sem er þrítugur Keníumaður, kom í mark á einni klukkustund, 59 mínútum og þrjátíu sekúndum.

Hann bætti heimsmet landa síns, Kelvins Kiptum, um rúma mínútu. Kiptum hljóp á tveimur klukkustundum og 35 sekúndum í Chicago-maraþoninu í október 2023.

Sawe var reyndar ekki sá eini sem hljóp á undir tveimur klukkustundum í Lundúnamaraþoninu í dag því Yomif Kejelcha kom í mark á 1:59,41, í sínu fyrsta maraþoni á ferlinum. Jacob Kiplimo, heimsmethafi í hálfmaraþoni, varð svo þriðji á 2:00:28.

Sawe, Kejelcha og Kiplimo hlupu því allir á betri tíma í dag en Kiptum þegar hann setti heimsmetið sitt fyrir tæpum þremur árum.

Sawe hrósaði einnig sigri í Lundúnamaraþoninu í fyrra. Þá hljóp hann á tveimur klukkustundum, tveimur mínútum og 27 sekúndum. Sawe vann einnig Berlínarmaraþonið á síðasta ári.