Jokic rekinn út úr húsi og Den­ver á bjarg­brúninni

Undir blálok leiksins, þegar Úlfarnir voru fjórtán stigum yfir, setti Jaden McDaniels niður sniðsskot. Það fór illa í Jokic sem bjóst við að McDaniels myndi láta tímann renna út.

Jokic hljóp í áttina að McDaniels og stjakaði við honum. Í kjölfarið sauð upp úr. Jokic var á endanum sendur í sturtu ásamt Julius Randle, leikmanni Minnesota. Jokic skoraði 24 stig í leiknum í nótt, tók fimmtán fráköst og gaf níu stoðsendingar.

„Leikurinn var búinn og úrslitin ráðist. Árið 2026 gerist svona lagað ekki lengur. Svona lagað gerðist á 9. áratugnum þegar lið héldu áfram að skora. En svona er hann,“ sagði David Adelman, þjálfari Denver, eftir leikinn sem Minnesota vann, 112-96. Úlfarnir eru 3-1 yfir í einvíginu.

Ayo Dosunmu var stigahæstur í liði Minnesota með 43 stig en það er það mesta sem varamaður hefur skorað í úrslitakeppni NBA í fimmtíu ár. Dosunmu hitti úr þrettán af sautján skotum sínum, þar af öllum fimm þriggja stiga skotunum, og nýtti öll tólf vítaskotin sín.

Meistarar Oklahoma City Thunder náðu 3-0 forystu í einvíginu við Phoenix Suns með 109-121 sigri í nótt. Shai Gilgeous-Alexander skoraði 42 stig fyrir OKC og hitti úr fimmtán af átján skotum sínum. Dillon Brooks skoraði 33 stig fyrir Suns.

New York Knicks jafnaði metin í einvíginu gegn Atlanta Hawks í Austurdeildinni í 2-2 með sigri í fjórða leik liðanna, 98-114. OG Anunoby skoraði 22 stig fyrir Knicks og Karl-Anthony Towns var með þrefalda tvennu; tuttugu stig, tíu fráköst og tíu stoðsendingar. CJ McCollum skoraði sautján stig fyrir Haukana.

Þá sigraði Orlando Magic Detroit Pistons, 113-105, og er 2-1 yfir í rimmu liðanna. Paolo Banchero og Desmond Bane skoruðu 25 stig hvor fyrir Orlando en Cade Cunningham var atkvæðamestur hjá Detroit með 27 stig og níu stoðsendingar.