„Þetta ein­vígi mun ráðast á þeim“

Enginn leikmaður í einvíginu býr yfir meiri reynslu en Björgvin Páll og vafalaust mun hans reynsla vega þungt fyrir Valsmenn í þessari seríu. Það verður sérlega mikilvægt fyrir Björgvin að verja áfram vel því hinumegin hefur Daníel Freyr Andrésson líka verið sjóðheitur.

„Já undanúrslitaeinvígin voru svoleiðis hjá báðum liðum, þau réðust á markvörslu. Í svona stórum leikjum þá er markvarslan alltaf mikilvæg og þar spilar líka inn í hvernig vörnin er. Hraðaupphlaupin hjá okkur eru háð því, að þeir spili góða vörn og ég verji, þá verðum við hættulegri fram á við.“

Björgvin hefur hins vegar trú á því að markmennirnir muni ekki ráða úrslitum í einvíginu, heldur verði það einhver ungur leikmaður í öðru hvoru liðinu. Bæði lið eru einmitt með mjög efnilega leikmenn, til dæmis Gunnar Róbertsson hjá Val og Garðar Inga Sindrason eða Ómar Darra Sigurgeirsson hjá FH.

„Það eru leikmenn í báðum liðum sem hafa þroskast gríðarlega hratt og tekið að sér stór hlutverk, bæði varnarlega og sóknarlega. Þeir hafa verið áberandi, Garðar og Ómar hjá þeim og Gunnar hjá okkur, sóknarlega. En svo eru líka öflugir varnarmenn, eins og Ingvar [Dagur Gunnarsson] hjá þeim eða Dagur Leó [Fannarsson] hjá okkur… Þetta einvígi mun klárlega ráðast á þeim.“

Viðtalið við Björgvin Pál má sjá í spilaranum að ofan. 

Leikur Vals og FH hefst klukkan 19:30 á morgun, föstudag, og verður í beinni textalýsingu á Vísi.