Grótta færist nær úr­vals­deild en fall blasir við Stjörnunni

Gróttukonur höfðu unnið tæpan sigur í Garðabæ í fyrsta leik liðanna og þeim tókst að fylgja honum vel eftir í dag, eftir fjögurra marka tap í síðasta leik á heimavelli.

Grótta leiðir því einvígið 2-1 og með sigri í næsta leik liðanna á sunnudag tekur Grótta stökkið upp í úrvalsdeild. Stjarnan þarf hins vegar að sækja sigur á Seltjarnarnesið til að halda sér á lífi og knýja fram oddaleik í einvíginu.

Ída Margrét Stefánsdóttir var potturinn og pannan í sigri Gróttu í dag. Hún skoraði 12 mörk úr 17 skotum, tvö þeirra úr vítum og sex úr hraðaupphlaupum, ásamt því að gefa 6 stoðsendingar.

Grótta skoraði fyrstu fjögur mörk leiksins og leit í raun aldrei um öxl. Grótta leiddi með sex mörkum í hálfleik, Stjarnan minnkaði muninn niður í tvö mörk í upphafi seinni hálfleiks en svo átti forysta Gróttu bara eftir að stækka þar til yfir lauk.