Fé­lag Ragnars Freys telur upp­sögn hans ó­lög­mæta

Ragnar Freyr greindi frá því síðustu viku að honum hefði verið sagt upp störfum á Landspítalanum. Hann var í nokkurra mánaða launalausu leyfi en starfaði annars í þrjátíu prósenta starfshlutfalli. Uppsögnin vakti mikla athygli enda hefur verið fjallað mikið um læknaskort á spítalanum.

Ólögmæt uppsögn

Læknafélag Reykjavíkur, sem Ragnar Freyr hefur gegnt formennsku í undanfarin ár og hefur meðal annars vegna þess verið í hlutastarfi á spítalanum, hefur nú sent frá sér yfirlýsingu vegna málsins.

„Læknafélag Reykjavíkur lýsir yfir furðu og vonbrigðum með ákvörðun Landspítala Háskólasjúkrahúss að leggja niður starf formanns LR. Þá hefur komið fram að í raun er ekki verið að leggja starfið niður heldur sé í raun um ólögmæta uppsögn að ræða.“

Rök Rafns haldi ekki vatni

Þá rekur félagið að Rafn Benediktsson, framkvæmdastjóri bráða-, lyflækninga- og endurhæfingarþjónustu Landspítalans, sem beri ábyrgð á uppsögninni, hafi í fjölmiðlum lýst því að ástæða niðurlagningar starfsins sé rík aðhaldskrafa og lágt starfshlutfall formannsins.

„Sú ástæða stenst ekki skoðun ef hærra starfshlutfall er samt sem áður í boði. Formaður LR er í trúnaðarstöðu sem hagsmunagæslumaður stærsta hóps lækna í hlutastarfi við LSH. Vinnuveitandi hefur lagalega aukna skyldu um rökstuðning fyrir uppsögn trúnaðarmanns auk þess sem samráð við viðkomandi stéttarfélag er skilyrði áður en til aðgerða af þessu tagi er gripið. Hvorugt var virt í þessu tilviki.“

Stjórn LR líti svo á að brotið sé gegn félagsmönnum LR þegar gengið er fram með þessum hætti af hálfu LSH. Vernd trúnaðarmanna sé hornsteinn íslensks vinnumarkaðar. Veikist sú vernd hafi það víðtækar afleiðingar fyrir réttindi starfsmanna og fyrir starfsemi stéttarfélaga.

Fylgja málinu eftir

Loks segir að Læknafélag Reykjavíkur krefjist eftirfarandi:

1. Lagður verði fram fullnægjandi rökstuðningur fyrir ástæðum þess að staða formanns LR hefur verið lögð niður.
2. Upplýst verði með hvaða hætti samráð fór fram. 
3. Sýnt verði, með óyggjandi hætti, fram á að niðurlagning starfsins tengist með engum hætti og sé óháð trúnaðarmannshlutverki formanns LR.

„Stjórn LR mun fylgja þessu máli eftir og áskilur sér allan rétt til að grípa til viðeigandi lagalegra úrræða.“

Undir bréfið ritar Katrín R. Kemp Guðmundsdóttir, varaformaður Læknafélags Reykjavíkur, fyrir hönd stjórnarinnar.