„Auð­vitað bara dugar þetta ekki“

„Það er auðvitað bara svekkjandi að tapa þessu. Fyrri hálfleikur var ekki nógu góður af okkar hálfu, varnarlega erum við of soft og ólíkir sjálfum okkur að mínu mati. Við gerðum of mikið af mistökum og sóknarlega bara skorum við einfaldlega ekki nógu mikið,“ sagði Gunnar.

„Við þurfum bara að skora meira. Það er bara sóknarleikurinn sem við þurfum að laga, en við fáum líka fullt af færum sem við þurfum að nýta. Þeir að mínu mati gefa okkur fullt af tækifærum í seinni hálfleik til að koma okkur inn í þetta, en við bara nýtum það illa.“

Gunnar hefur áður talað um það í þessu einvígi að hann þurfi framlag frá fleiri leikmönnum. Í kvöld fékk hann samalagt 13 mörk frá Skarphéðni Ívari Einarssyni og Frey Aronssyni, en aðrir leikmenn skoruðu tvö mörk eða minna.

„Þú getur bara spilað aftur viðtalið við mig frá því eftir leik eitt. Auðvitað bara dugar þetta ekki, það bara segir sig sjálft. Við erum í undanúrslitum. Það verða fleiri að stíga upp því við erum alveg með menn sem hafa getuna í það.“

„Margir af þeim stigu upp í síðasta leik, en horfu bara á tölfræðina í kvöld. Það eru fáir með meira en eitt mark og þá er þetta bara erfitt. Við þurfum meira og við getum meira. Við eigum helling inni, alveg klárlega.“

En hvað þurfa Haukar að gera til að virkja þetta sem Gunnar segir að þeir eigi inni?

„Við þurfum að ná að spila af okkar getu og nýta núna þessa daga vel. Safna kröftum og svara fyrir þetta á föstudaginn. Þetta eru tvö hörkulið og lítið á milli þeirra, en við getum betur en þetta og eigum inni. Við eigum góða leikmenn sem geta miklu meira og við þurfum að stíga upp saman.“

Að lokum var Gunnar spurður út í atvikin tvö í leiknum þar sem dómararnir fóru í skjáinn til að skoða brot hans manna. Freyr Aronsson slapp með tvær mínútur, en Ólafur Ægir Ólafsson fékk að líta beint rautt spjald.

„Ég sé þetta svo illa. Ég þarf bara að sjá þetta í sjónvarpinu, en ef þeir fara í skjáinn þá getur þetta ekki verið annað en rétt. Ég sé þetta engan veginn þarna á vellinum. Þetta eru einhver högg þarna og lítið við þessu að segja. Ég held að hvorugt af þessu hafi verið viljandi en þegar maður fer í andlitið eins og Óli gerir þá er það bara rautt held ég,“ sagði Gunnar að lokum.