Snorri og Arnór eftir­sóttir: Á­hugi er­lendis frá en HSÍ enn í for­gangi

„Það gengur mjög vel,“ segir Arnar Freyr Theodórsson, um­boðs­maður Snorra Steins og Arnórs Atla­sonar í sam­tali við Vísi en Snorri Steinn hefur áður lýst yfir vilja sínum gagn­vart því að halda áfram með ís­lenska lands­liðið.

Fjár­hags­staða HSÍ, sem og mikið af verk­efnum hjá fáliðaðri skrif­stofu sam­bandsins, hafi þó gert viðræðurnar lang­dregnari enn menn vildu en bjartsýni ríkir hjá báðum gagn­vart því að samningar náist.

Undir stjórn Snorra Steins og Arnórs hefur ís­lenska lands­liðið tekið fram­fara­skref á hverju stór­móti sem liðið hefur tekið þátt í og var niður­staðan nú á EM nú í upp­hafi árs fjórða sætið eftir tap gegn Króötum í leik um brons­verð­laun.

Vefsíðan Hand­kastið greindi frá því í upp­hafi mánaðar að Nicola­j Jacob­sen, lands­liðsþjálfari Dan­merkur, hefði hug á því að fá Arnór sem að­stoðarþjálfara sinn.

Áhugi annarra liða hefur verið víðtækari en svo og ekki ein­göngu bundinn við Arnór.

„Það hefur verið áhugi er­lendis frá á bæði Snorra og Arnóri,“ segir Arnar Freyr.

Að­spurður hvort áhuginn sé bundinn við lands- eða félagslið segir Arnar að bæði félagslið og lands­lið er­lendis frá hafi spurt út í stöðuna hjá bæði Snorra Steini og Arnóri sem er einnig aðalþjálfari danska úr­vals­deildar­félagsins TTH Hol­stebro.

Viljinn til staðar

Tónninn í Arnari Frey gagn­vart viðræðunum er jákvæður og að mörgu leiti sam­bæri­legur þeim hjá Jóni Halldórs­syni, for­manni HSÍ, sem ræddi við Vísi í upp­hafi mánaðarins um viðræðurnar.

Það virðist bæði for­gangs­mál hjá Snorra sem og Arnóri að halda veg­ferð sinni með ís­lenska lands­liðið áfram. Góður taktur hefur verið í liðinu og mikinn hug má greina í leik­mönnum lands­liðsins gagn­vart fram­haldinu.

„Þig langar í meira. Það spilar saman með því sem hefur verið að gerast í lands­liðinu. Við finnum það þar að við erum að nálgast eitt­hvað stórt,“ sagði Janus Daði Smára­son, lands­liðs­maður í sam­tali við Vísi undir lok mars eftir að hafa skrifað undir samning hjá stór­liði Barcelona.