„Við gátum bara ekki komið boltanum ofan í körfuna“

„Við byrjuðum leikinn mjög illa og eftir fyrsta leikhlutann var leikurinn eiginlega bara farinn frá okkur. Við klikkuðum á skotum og misstum síðan bara sjálfstraustið. Varnarlega var þetta samt allt í lagi, þær skoruðu 42 stig í fyrri hálfleik, sem er ekkert svo slæmt.

Síðan mættum við betur út í seinni hálfleikinn, með meiri orku. En hittum samt bara úr 1 af 26 þriggja stiga skotum, við gátum bara ekki komið boltanum ofan í körfuna. Þá misstum við sjálfstraustið og Njarðvík var bara miklu betri en við í dag,“ sagði þjálfarinn í viðtali við Arnar Skúla Atlason eftir leik.

Israel ítrekaði að varnarleikur liðsins hefði ekki verið stóra vandamálið í kvöld. Skotnýting liðsins fyrir aftan þriggja stiga línuna var stóra vandamálið í hans augum.

„Mér fannst við gera allt í lagi varnarlega, við töluðum allavega um það í fyrri hálfleik. En okkur vantaði bara að setja þriggja stiga skot ofan í, til að opna þær aðeins og búa til pláss fyrir Madi[son Sutton]. Við erum með góða skotmenn en við vorum ekki að hitta og létum það fara í taugarnar á okkur.“

Tindastóll þarf núna nauðsynlega á sigri að halda þegar liðin mætast aftur næsta miðvikudag.

„Núna þurfum við bara að einbeita okkur að næsta leik, við höfum ekki neinu að tapa. Við munum reyna að njóta og ná sigri til að geta snúið aftur í Skagafjörðinn. Við munum berjast fyrir þessum sigri.“