KA sendi Eyja­menn í sumar­frí

KA vann leikinn 25-24 eftir að hafa verið 13-11 yfir í hálfleik.

Dagur Gautason skoraði sigurmarkið stuttu fyrir leikslok og Ágúst Elí Björgvinsson varði svo lokaskot Eyjamanna.

KA vann fyrsta leikinn úti í Vestmannaeyjum sem var tvíframlengdur og þar með einvígið 2-0 eftir þennan sigur í kvöld.

KA mætir annaðhvort Val eða HK í undanúrslitaeinvíginu en þau mætast í annað skiptið í kvöld eftir að Valur vann fyrsta leikinn í framlengingu.

Dagur Gautason og Einar Birgir Stefánsson voru markahæstir hjá KA með fimm mörk hvor en Bjarni Ófeigur Valdimarsson var með fjögur mörk.

Ágúst Elí Björgvinsson varði mjög vel í marki KA, samtals nítján skot þar af þrjú víti. Hann var án efa besti maðurinn í þessu einvígi. KA fékk tíu fleiri varin skot í leiknum í kvöld þökk sé honum.

Dagur Arnarsson var markahæstur hjá ÍBV með sex mörk en þeir Hákon Daði Styrmisson og Elís Þór Aðalsteinsson skoruðu fimm mörk hvor.

Leikurinn var jafn í upphafi en Eyjamenn voru tveimur mörkum yfir, 10-8, þegar innan við tíu mínútur voru til hálfleiks. KA-menn unnu lokakafla hálfleiksins 5-1 og voru 13-11 yfir í hálfleik.

KA-menn voru fjórum mörkum yfir, 19-15, þegar minna en tuttugu mínútur voru til leiksloka.

Eyjamenn náðu 4-1 spretti og munurinn var allt í einu orðinn bara eitt mark, 20-19, og korter var eftir af leiknum.

Lokamínúturnar voru æsispennandi en KA-menn voru sterkari á lokasprettinum, ekki síst vegna markvörslu Ágústar.