„Hann lýgur bara til að komast undan þessu“

Hlynur Leifsson var eftirlitsmaður HSÍ á leiknum og neitaði að hefja seinni hálfleikinn fyrr en stuðningsmenn hlýddu. Hlynur bað þá um að setjast aftur í sömu sæti og þeir höfðu setið í fyrri hálfleik, en stuðningsmenn Fram höfðu fært sig yfir í hinn hluta stúkunnar.

Hlynur sagði í samtali við Vísi í gær að stuðningsmennirnir hefðu verið á ólöglegu svæði.

Myndbandsupptökur frá leiknum sýna hins vegar og sanna að stuðningsmennirnir voru ekki á því svæði sem eftirlitsmaðurinn Hlynur vildi meina. Vísir hafði því samband við Einar Jónsson:

„Það er bara algjört kjaftæði. Það er hægt að sjá hvar þeir voru. Hann lýgur bara til að komast undan þessu. Það er hægt að sjá þetta á myndbandi, þeir eru víðs fjarri ritaraborðinu þegar þeir eru reknir í burtu. Þeir sitja þarna í fjórðu, fimmtu röð, einhvers staðar við endann á varamannabekk FH. Hann á ekkert að komast upp með að ljúga bara til að redda sér.“

Einar segir líka allt annað hljóð í rökstuðningi Hlyns í gær miðað við það sem hann sagði í hálfleik. Þar hafi Hlynur vitnað í reglur sem eru ekki til.

„Ég veit að það er ólöglegt svæði að vera með trommur við skiptisvæði eða fyrir aftan tímavarðaborð. En rökin sem hann færði fyrir því að þeir mættu ekki vera þarna voru þau að þeir mættu ekki færa sig á milli hálfleika. Það er það sem hann segir og ég bað hann um að sýna mér þær reglur. Hann gat náttúrulega ekki vitnað í neinar reglur.“

Þá vill Einar einnig meina að reglan sem Hlynur vitnaði í eftir á, í skriflegu svari til Vísis, hafi ekki verið gild í þessu tilfelli í Kaplakrika.

„Salnum er skipt þannig upp að áhorfendur Fram í gestastúkunni eru fyrir aftan varamannabekki og tímavarðaborð. Svo ertu með FH stuðningsmenn hinumegin. Þar með fellur þessi regla um sjálft sig. Vegna þess að þá eru þeir að mismuna áhorfendum. FH getur verið með trommur og sína stuðningsmannasveit hvar sem er, á meðan stuðningsmönnum Fram eru sett takmörk. Þannig að reglan er ekki einu sinni gild í þessu tilfelli sem hann vitnar í.“

Veit ekki hvaðan þetta kemur

Framarar hafa verið mjög ósáttir við þessa framkomu við stuðningsmenn og Einar veltir því fyrir sér hver kveikjan að þessu máli hafi orðið.

„Þetta er bara lygi og léleg útgönguleið úr þessu máli. Þetta er ömurleg framkoma gagnvart stuðningsmönnum okkar og að einhverju leiti velti ég bara fyrir mér hvaðan þetta kemur. Eru það FH-ingar eða er þetta hann sem tekur upp á þessu bara sjálfum sér að koma svona fram við okkar stuðningsmenn?... Ég talaði við Aron [Pálmarsson] og hann skildi hvorki upp né niður í þessu, þannig að ég veit bara ekki hvaðan þetta kemur.“

Lambhagahöllin í Úlfarsárdal, ekki Norður-Kóreu

Liðin mætast aftur á mánudag og Íslandsmeistarar Fram ljúka sínu tímabili ef þeir tapa. En verður stuðningsmönnum FH skipað að sitja í sömu sætum allan leikinn í Lambhagahöllinni?

„Nei, nei, nei. Við viljum bara hafa sem mesta stemningu og læti. FH á frábæra stuðningsmenn og þeim er velkomið að sitja bara þar sem þeir vilja inni á sínu svæði… Þetta er ekki Norður-Kórea. Mönnum er frjálst að sitja bara þar sem þeir vilja í sinni stúku.“