Íslendingaliðið með annan fótinn í úr­slita­leik Evrópubikarsins

Häcken vann 3-0 sigur á Eintracht Frankfurt í fyrri undanúrslitaleiknum og þær eiga seinni leikinn eftir á heimavelli.

Häcken sló Breiðablik út úr keppninni og sýndi þá að þær eru til alls líklegar í þessari keppni.

Fanney Inga Birkisdóttir og Thelma Karen Pálmadóttir voru báðar í byrjunarliði Häcken, Fanney Inga hélt marki sínu hreinu og Thelma Karen var á vængnum. Thelma fór af velli á 88. mínútu þegar öruggur sigur var í höfn.

Hin magnaða Felicia Schröder, átján ára framherji Häcken, skoraði tvívegis í leiknum en fyrsta mark liðsins skoraði Alva Selerud á 16. mínútu.

Schröder skoraði mörkin sín á 70. og 84. mínútu.

Það stefnir í sænskan úrslitaleik með tveimur Íslendingaliðum því Guðrún Arnardóttir og félagar hennar í Hammarby eru 3-2 yfir eftir útileik í Prag fyrr í kvöld.