Segjast hafa sent tvo hátt­setta Írani til „dýpstu kima hel­vítis“

Fjölmiðlar í Ísrael hafa eftir Israel Katz, varnarmálaráðherra, að Larijani hafi verið felldur í loftárás í gærkvöldi. Larijani hefur lengi verið áhrifamikill í klerkastjórninni í Íran en hann var á árum áður herforingi í íranska byltingarverðinum.

Í yfirlýsingu frá ísraelska hernum segir að aðrar loftárásir hafi í gær verið gerðar sem beindust gegn Gholamreza Soleimani, sem leitt hefur Basij-sveitirnar undanfarin sex ár. Hann er sagður hafa tekið virkan þátt í að brjóta mótmæli fyrr á þessu ári í Íran á bak aftur. Þúsundir mótmælenda eru sagðir hafa verið skotnir af öryggissveitum.

Soleimani hefur verið beittur refsiaðgerðum af Bandaríkjunum, Evrópusambandinu og fleirum vegna aðkomu hans að því að brjóta mótmæli í Íran á bak aftur í gegnum árin.

Í yfirlýsingunni segir að þeir Larijani og Soleimani bætist nú í hóp tuga annarra háttsettra leiðtoga Íran sem hafi verið felldir á undanförnum tveimur vikum og rúmlega það. Haldið verði áfram að elta leiðtoga klerkastjórnarinnar uppi og fella þá.

Þá hefur Times of Israel eftir Katz að þeir tveir, og allir hinir sem hafi verið felldir, dvelji nú í „dýpstu kimum helvítis“.

Árásirnar sem bönuðu Soleimani voru gerðar á tjaldbúðir sem Basij-sveitirnar höfðu reist í Íran. Ísraelar segja marga af æðstu leiðtogum sveitanna hafa einnig fallið í árásunum.

Wall Street Journal sagði frá því í gær að öryggissveitir í Íran væru byrjaðar að taka hart á meintum andstæðingum klerkastjórnarinnar, með því markmiði að reyna að koma í veg fyrir frekari mótmæli og andhóf við ríkisstjórnina.

Basij-sveitirnar spila stóra rullu í því en fólk hefur verið handtekið fyrir meint samstarf með erlendum aðilum og þá hefur fólki sem þykir líklegt til að efla til mótmæla verið hótað.